ЗэлъашIэрэ бзэшIэныгъэлэжьэу, филологие шIэныгъэхэмкIэ докторэу, Урысые Федерацием шIэныгъэмкIэ изаслуженнэ IофышIэшхоу ЗекIогъу Уцужьыкъо къызыхъугъэр илъэс 95-рэ зэрэхъугъэм епхыгъэу гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм шIэныгъэ конференцие щызэхащэгъагъ.

Iофтхьабзэм адыгабзэхэм яграмматикэ гъэпсыкIэу иIэр, ахэм ябзэхэбзэ нэшанэхэр, тхэкIэ шэпхъэ тэрэзхэр, адыгабзэхэм ябзэхэбзэ зэхэлъыкIэ адыгэ ыкIи тимылъэпкъэгъу шIэныгъэлэжьхэм къыраIуалIэ­хэрэр, бзэшIэныгъэм къыубытырэ пстэумэ алъыIэсэу къыриIотыкIыныр ипшъэрылъыгъ.

ШIэныгъэ конференцием ежь институтым ишIэныгъэлэжьхэр, АКъУ-м ишIэныгъэлэжьхэм ащыщ­хэр, аспирантхэр, юбилярым иIахьылхэр, ишъхьэгъусэу Зе­кIогъу Светланэ хэлэжьагъэх. ПэIудзыгъэ шIыкIэм тетэу Къэ­рэщэе-Щэрджэс, Къэбэртэе-Бэлъ­къар республикэхэм ялIыкIохэр конференцием къыхэлэжьагъэх.

Ионэ Щэуал Хьаджымурат ыкъом, филологие шIэныгъэхэмкIэ кандидат, профессор, гуманитар ушэтынхэмкIэ Къэрэщэе- Щэрджэс республикэ институтым иотдел ипащ, Тыркуем ит къалэу Кайсери иуниверситет рагъэблэгъагъэу Iоф щешIэ, темэу «Инновации в адыгской учебно-лингвистической терминологии» зы­фиIорэ доклад шъхьаIэр къы­шIыгъ. Табыщэ Мурат Арсен ыкъом, гъэзетэу «Адыгэ псалъэм» иобоз­реватель, адыгабзэхэмрэ литературэмрэкIэ Ассоциациеу Къази Атажукиным ыцIэ зыхьырэм иIэшъхьэтет, «ЗекIогъу Уцу­жьыкъу: гъашIэмрэ шIэны­гъэмрэ» зыфиIорэ докладыр къыриIотыкIыгъ.

Конференцием видеофильмэу «ИгущыIи игупшыси пытэх» зыцIэу гуманитар ушэтынхэмкIэ Адыгэ республикэ институтым иIофышIэу, социологие шIэныгъэ­хэмкIэ кандидатэу ГъукIэлI Зухра къыгъэхьазырыгъэм цIыф­хэр рагъэплъыгъэх.

Сыд фэдэрэ бзи зые лъэп­къым лъэныкъуабэкIэ фэлажьэ. Ар кIагъэтхъэу филологие шIэныгъэхэмкIэ докторэу, профессорэу, институтым инаучнэ IофышIэ шъхьаIэу Бырсыр Батыр­бый «Флексия глагольных основ в адыгских языках» зыфиIорэ къиIотыкIыныр къышIыгъ. ЗекIогъу Уцужьыкъо ыбзэ ифилософие; ЗекIогъу Уцужьыкъорэ литературабзэмрэ; У. ЗекIогъум Бэрсэй Умарэ ибаснэхэр къытлъигъэIэсыжьыгъэх: Адыгэ тхыгъабзэм имакъэхэр зыфиIорэ темэхэр къыраIотыкIыгъэх шIэныгъэлэжьхэу Хьанэхъу Рус­лъан, Къуекъо Асфар, филологие шIэныгъэхэмкIэ кандидатэу ЖакIэмыкъо Заримэ ыкIи медицинэ шIэныгъэхэмкIэ кандидатэу, Дунэе Адыгэ Хасэм ипрезидент иупчIэжьэгъоу Мэщ­фэшIу Нэдждэт.

Джащ фэдэу нэбгырэ пчъагъэ­мэ шIэныгъэлэжь инэу, гупшысэкIо-угъоякIоу, щэIэфэ, хьалэлэу адыгабзэм иIофыгъуабэ зэхэзыфыгъэу, зыгъэунэфыгъэу, зылэ­жьыгъэу, бзэшIэныгъэм лъэу­жышIу щызиIэ ЗекIогъу Уцужьыкъо фэгъэхьыгъэ гущыIэхэр къашIыгъэх.

ШIэныгъэ конференциемкIэ зэфэхьысыжь кIэкIхэр ашIыгъэх, къиIотыкIынхэр, еплъыкIэ гъэнэфагъэхэр а зэкIэмкIэ зыдэт тхылъ къытырадзэжьыщт.

БзэшIэныгъэлэжь инэу Зе­кIогъу Уцужьыкъо ыцIэкIэ зэхащэгъэ Iофтхьабзэр зэрищагъ филологие шIэныгъэхэмкIэ док­торэу, гу­манитар ушэтынхэмкIэ Адыгэ республикэ институтым ипащэ игуадзэу Биданыкъо Марзият.

Дзэукъожь Нуриет.

Сурэтхэр: А. Iэшъын.