Адыгэ Республикэм искусствэхэмкIэ икIэлэцIыкIу еджапIэхэм ачIэсхэр «Моя Россия — град Петров» зыфиIорэ гъогууанэм техьащтых.

КIэлэеджакIохэм апае зэхащэгъэ культурнэ программэм чъэпыогъум и 17-м къыщегъэжьагъэу и 19-м нэс ахэр хэлэжьэщтых.

Лъэпкъ проектэу «Культурэм» къыхиубытэрэ шъо­лъыр проектэу «Творческэ цIыфхэр» зыфиIорэм тегъэпсыхьагъэу а Iофтхьабзэр кIощт.

Шапхъэу къагъэуцугъэм тетэу кIэлэеджакIохэм азыфагу щызэхащэгъэ зэнэкъокъум икIэуххэм ялъы­тыгъэу гъогум техьащт нэбгырэ 36-р къахахыгъ.

Мэфищ программэм хэлэжьэщтхэм Санкт-Петербург къыщакIухьащт, Петр I-м ыцIэкIэ щыт Гупчэ хы-дзэ музеим, Гъэмэфэ паркым, Къэралыгъо Эрмитажым, Петропавловскэ пытапIэм, Къэралыгъо музей-заповедникэу «Петергоф» ыкIи музееу «Петровская Акватория» зыфиIорэм закъыщаплъыхьащт.