Я 25-рэ Урысые мэкъумэщ къэгъэлъэгъонэу «Дышъэ бжыхь-2023-рэ» зыфиIоу Москва щыкIуагъэм Адыгеир хэлэжьагъ.

— Урысые къэралыгъо аграрнэ университетэу Москва дэт мэкъумэщ академиеу К. А. Ти­мирязевым ыцIэ зыхьырэм ичIыпIэ хэхыгъэ республикэм икъэгъэлъэгъон щыкIуагъ. Ти­къэ­ралыгъо ишъолъыр зэфэ­шъ­хьафхэм ащыпсэухэрэм, мы отраслым иэкспертхэм, инвесторхэм Адыгеим иагропромышленнэ комплекс, ащ къыщыдагъэкIырэм нэIуасэ зыфашIын амал яIагъ, — къащитхыгъ со­циальнэ хъытыухэм Адыгеим и ЛIышъхьэу КъумпIыл Мурат.

Шъолъырым ибрендхэр къэгъэлъэгъоным рахьылIагъэх. Ахэм адыгэ къуаер, адыгэ щыгъур, адыгэ щаир, тыгъэгъэзэ дагъэр, шъоур, хэтэрыкIхэр, пхъэшъхьэ-мышъхьэхэр, къэгъа­гъэхэр, нэмыкIхэри ахэтыгъэх.

«Дышъэ бжыхьэ-2023-м» хэлажьэхэрэм интерактивнэ шIыкIэм тетэу шъо­лъы­рым инвестиционнэ амалэу IэкIэлъыр, мы лъэныкъомкIэ проектэу ыгъэпсыгъэхэр ыкIи Iоф зыдишIэхэрэр арагъэлъэ­гъугъэх.

Адыгеим имуниципалитетхэм ыкIи имэкъумэщ хъыз­мэтшIапIэхэм ащыщхэм ме­дальхэр ыкIи шIухьафтынхэр къараты­гъэх.

Къуаджэм хэхъоныгъэ егъэшIыгъэнымкIэ гъэхъэгъэшхохэр зэриIэхэм фэшI Кощхьэблэ рай­оным иадминистрацие ты­жьын медаль къыфагъэшъошагъ.

— Къэгъэлъэгъон дэгъухэр тиIэу мы мафэм тыкъекIолIагъ. Шъолъыр гупчэм иIэпыIэгъу ишIуагъэкIэ лъэныкъо зэфэшъхьафхэмкIэ гъэхъэгъэшIухэр тиIэх. Фельдшер-мамыку IэзапIэхэр тэшIых, культурэм иунакIэхэр, спорт комплексхэр, футбол ешIапIэхэр тэгъэпсых. Джащ фэдэу кIэлэцIыкIухэм ясэнаущыгъэ зыщыхагъэхъорэ гъэсэныгъэ инновационнэ площадкэхэр кIэу тэшIых. Гъэсэныгъэм, псауныгъэр къэухъумэгъэным, культурэм, спортым ящыкIэгъэ Iэмэ-псымэхэр зэкIэ тиIэх.

Районым щыпсэухэрэм яшIуа­гъэкIэ мыщ фэдэ къэгъэлъэгъон­хэм такъыфэкIуагъ. ЧIыгум щы­­лажьэрэ нэбгырэ пэпчъ, са­бый­хэр зыпIухэрэр ыкIи гъэсэныгъэ языгъэгъотыхэрэр, цIыф­хэр зыгъэхъужьыхэрэр, унэхэр зы­шIыхэрэр, тихэгъэгу къэзыухъу­мэхэрэр, творчествэм дэла­жьэхэрэр, общественнэ IофшIэныр зыгъэцакIэхэрэр ары мы тын лъапIэм зиIахьышIу хэлъхэр. Тызэгъусэмэ лъэгэпIэ инхэм тызэранэсын тлъэкIыщтыр мы медалым джыри зэ къыушыхьатыгъ, — къыщиIуагъ Телеграм-каналым район администрацием ипащэу Хьамырзэ Заур.