Адыгэ Республикэм и Мафэ ипэгъокIэу шъолъырым радио ыкIи телевизионнэ къэтынхэр ащылъызгъэIэсырэ гуп­чэм шIухьафтын дахэ къыгъэхьазырыгъ. Ащ фэгъэхьыгъэ къэбарыр социальнэ хъытыум Адыгеим и ЛIышъхьэу КъумпIыл Мурат къыщитхыгъ. — Джы мэзэхэ уахътэм шъо зэфэшъхьафхэмкIэ телевизионнэ мачтэр Мыекъуапэ къыщынэ­фыщт! Архитектурнэ-художественнэ нэфынэр къэзытырэ пкъы­гъом уахътэм диштэу (динамическэу) Iоф ышIэщт. Мыр Адыгеим икъэлэ гупчэкIэ къэбар гушIуагъоу сэлъытэ. Нэгыежъ Iуашъхьэм тет метрэ 200 хъурэ телевизионнэ мачтэр къэтынхэр алъызыгъэIэсырэ амал закъоу щымытэу, джы бгъэ­лъэгъон плъэкIыщт чIыпIакIэхэм къахэхъуагъ, — къытхыгъ респуб­ликэм ипащэ.