Чъэпыогъум и 8-м Адыгеим жьыбгъэшхоу щыIагъэм гумэкIыгъохэр къыздихьыгъэх, Мыекъуапэ ипсэупIэхэм ащыщхэм электричествэм ирыкIуапIэхэр ащызэпичыгъ.

Электричествэр ямыIэу хьэблэ псау­хэр къэнэгъагъэх. Джащ фэдэу подстанциехэр къэзыгъэблэрэ пкъыгъохэр исты­кIыгъэх, ащ къыхэкIэуи унэгъуабэмэ электричествэр яIагъэп. Мыекъопэ электрическэ сетьхэм япресс-къулыкъу къызэритыгъэмкIэ, жьыбгъэр лъэшэу къызэрепщэрэм къы­хэкIэу щынэгъончъэным ишапхъэхэр къыдалъытэхэзэ а мафэм IофшIэнхэр къызэтырагъэуцуагъэх, арэу щытми, подстанциехэр чэщ ренэм агъэцэкIэжьы­гъэх.

КъыкIэлъыкIорэ мафэм пчэдыжьым рагъажьи, жьыбгъэм зэщигъэкъогъэ электричествэм ирыкIопIэ 17-м щыщэу 7-р агъэцэкIэжьыгъ.

Джащ фэдэу Мыекъуапэ иурамэу Пироговым ыцIэ зыхьырэм рыкIорэ электрическэ линиехэм ащыщхэр тыгъуа­сэ агъэцэкIэжьыгъэх. ЗэкIэмкIи гумэкIыгъом идэгъэзыжьын бригади 5 фэдиз хэлэжьагъ. ЧIыпIэ зэфэшъхьафхэм чъыг­хэр къащыритхъыгъэхэуи агъэунэфыгъ.

Мыекъопэ электрическэ сетьхэм яIофышIэхэм къызэраIуагъэмкIэ, жьыбгъэшхоу къилъыгъэм къыхэкIэу Мые­къуапэ ирайон цIыкIухэу Нефтянкэм, Шъхьэгуащэ ыкIыб, Шэуджэн къэлэ цIы­кIум, нэмыкIхэми электричествэм ирыкIуапIэхэр ащызэпичыгъэх, чъыгхэр къащыритхъыгъэх. ГумэкIыгъор дэгъэзыжьыгъэнымкIэ гъэцэкIэжьын IофшIэнхэр лъагъэкIуатэх.

Мы ошIэ-дэмышIэм зыпари хэкIодагъэп ыкIи шъобжхэр тещагъэхэ хъугъэп. ЩыIэныгъэмкIэ мэхьанэ зиIэ ыкIи гъэстыныпхъэ-энергетическэ хъызмэтым япхыгъэ псэуалъэхэм зэрар афэхъугъэп.

ГидрометеорологиемкIэ ыкIи тыкъэзыуцухьэрэ дунаим лъыплъэгъэнымкIэ Гупчэм къызэритыгъэмкIэ, мы мэфи­тIу-щым чъыIэщт, ау жьыбгъэр нахь Iэсэжьыщт. Тхьамафэр пштэмэ, гъубджымрэ бэрэскэжъыемрэ нахь чъыIэщт, ощх къещхыщт, фабэр градус 12 — 13. Чэщыр анахь зыщычъыIэщтыр мэфэкур ары, фабэу зы градус нахь щыIэщтэп. Арэу щытми, мафэм градус 16-м кIахьэу къэфэбэжьыщт. Зыгъэпсэфыгъо мафэхэм фабэу градус 22 — 23-рэ щыIэщт.

КIАРЭ Фатим.