УФ-м хэгъэгу кIоцI IофхэмкIэ и Министерствэ кIэща­кIо зыфэхъугъэ Урысые зэнэкъокъоу «Народный участковый-2023» зыфиIорэм иятIонэрэ едзыгъо чъэ­пыогъум и 7-м Адыгеим щырагъэжьагъ.

Полициемрэ общест­вэмрэ зэпхыныгъэу яIэр гъэпытэгъэным, цIыфхэм хэбзэухъумакIохэм цыхьэу афашIырэм хэгъэхъогъэным, мы къулыкъум имэхьанэ зыкъегъэIэтыгъэным илъэс пчъагъэ хъугъэу зэхащэрэ зэнэкъокъур фэIорышIэ.

Урысые зэнэкъокъум иапэрэ едзыгъо Iоныгъом и 11-м къыщегъэжьагъэу и 20-м нэс муниципальнэ мэхьанэ иIэу Адыгэ Рес­публикэм икъалэхэм ыкIи ирайонхэм ащырагъэ­кIо­кIыгъ. Амакъэ нахьыбэу зыфатыгъэ участковэхэр чIыпIэ къулыкъу пэпчъ къыщынэфагъэх. Джы ахэр зэнэкъокъум иятIонэрэ едзыгъо хэлажьэх. Ахэм якъэбар АР-м хэгъэгу кIоцI IофхэмкIэ и Ми­нистерствэ ыкIи район отделхэм ясайтхэм къарыхьащт.

АР-м хэгъэгу кIоцI Iоф­хэмкIэ и Министерствэ исайт шъуихьанышъ, шъугу рихьырэ къулыкъу­шIэм шъумакъэ фэшъутын амал шъуиI. Онлайн-мэкъэтыным изэ­фэхьысыжьхэмкIэ, зэнэ­къокъум иедзыгъо пэпчъ текIоныгъэ къыщыдэзы­хыгъэхэр къэнэфэщтых. ШIоигъоныгъэ зиIэ пэпчъ ежь зыфэе къулыкъушIэм ымакъэ фитын ылъэ­кIыщт.

Республикэ мэхьанэ зиIэ Iофтхьабзэр 2023-рэ илъэсым чъэпыогъум и 7-м щегъэжьагъэу и 16-м нэс рагъэкIокIыщт. Ащ текIоныгъэр къыщыдэзы­хырэм Адыгеир ящэнэрэ федеральнэ едзыгъом къыщигъэлъэгъощт.

Зэнэкъокъум текIоныгъэр ыкIи хагъэунэфы­кIырэ чIыпIэхэр къыщы­дэзыхыгъэхэм мэфэкI шIыкIэм тетэу полицием иупол­номоченнэ участковэ и Мафэ тефэу афэгушIощтых.