Адыгэ Республикэм щыпсэухэу лъытэныгъэ зыфэтшIыхэрэр! ТичIыпIэгъу лъапIэхэр! Адыгэ Республикэр зызэхащагъэр илъэс 32-рэ зэрэхъурэм пае тышъуфэгушIо!

Тиреспубликэ илIэуж пстэуми язэпхыныгъэ итамыгъэу щыт мы мэфэкIыр. Анахьэу тызыфэразэхэу непэ тыгу къэдгъэкIыжьыхэрэр Адыгэ автоном хэкум лъапсэ фэзышIыгъэхэр, илъэс 80-кIэ узэкIэIэбэжьымэ нэмыц-фашист техакIохэр Адыгеим изыфыжьыгъэхэу зиIофшIэнкIэ, зиIэпэIэсэныгъэкIэ, зисэнаущыгъэкIэ ащ игъэхъагъэхэм, ибаиныгъэхэм нахь ахэзыгъэхъуа­гъэхэр ары. Урысые Федерацием инэмыкI шъолъыр­хэм яфитыныгъэхэм афэдэхэр зиIэ тиреспубли— кэ тапэкIи хэхъоныгъэ зэришIыщт гъогум тезыщагъэхэу, цIыфхэм ящыIакIэ нахьышIу шIыгъэным мафэ къэс фэлажьэхэрэм инэу тызэрафэразэр къэтэIо.

Адыгеим щыпсэухэрэм ялъэкI зэрэрахьылIэрэм, Урысые Федерацием и Президент, и Правительствэ, Федеральнэ ЗэIукIэм къытатырэ IэпыIэгъум яшIуагъэ­кIэ тиреспубликэ ицыхьэ зытелъыжьэу ыпэкIэ лъэкIуа­тэ: инфрастурктурнэ проектышхохэр зэшIотэхых, культурэм, псауныгъэм икъэухъумэн, гъэсэныгъэм япхыгъэ учреждениехэр тэгъэпсых ыкIи тэгъэкIэжьых, промышленностым, мэкъу-мэщым, зекIоным хэхъоныгъэ ашIынымкIэ амалышIухэр ятэгъэгъотых.

Сыд фэдэ Iофыгъо къэуцугъэми, тызэгъусэу зэшIотэхы, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу тафэхъу. Мы мэфэкI мафэм Адыгеим щыпсэурэ пстэуми тызэрафэразэр къэтэIо зышъхьамысыжьхэу Урысыем илъэпкъ федэхэр къызэраухъумэхэрэм, IэпэIэсэныгъэ ахэлъэу зыфэгъэзэгъэ Iофхэр зэрэзэшIуахыхэрэм апае.

ЦIыф лъэпкъ зэфэшъхьафхэм къахэкIыгъэхэу Адыгеим исхэм яхъупхъагъэ, язэдегъэштэныгъэ, язэгурыIоныгъэ тиреспубликэ тапэкIи хэхъоныгъэ ышIыным зэрэфэлэжьэщтхэм, Адыгеимрэ Урысыемрэ яфедэ зыхэлъ текIоныгъакIэхэм лъэпсэ пытэ зэрафэхъущтым тицыхьэ телъ.

ТичIыпIэгъу лъапIэхэр, зэкIэми тышъуфэлъаIо щыIэкIэшIу шъуиIэнэу, унагъо пэпчъ хъярырэ гушIуагъорэ илъынхэу!

Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат

Адыгэ Республикэм и Къэралыгъо Совет —Хасэм и Тхьаматэу Владимир Нарожнэр