Абхъазым щыкIогъэ Хэгъэгу заом ТекIоныгъэр къызщыдахыгъэр илъэс 30 зэрэхъугъэм фэгъэхьыгъэ Iофтхьабзэхэу Сыхъум щыкIуагъэхэм ахэлэжьэнхэу, ткъошхэм афэгушIонхэу Абхъазым кIогъагъэх Адыгеим и ЛIышъхьэу КъумпIыл Муратрэ АР-м и Къэралыгъо Совет – Хасэм и Тхьаматэ игуадзэу, Урысыем и ЛIыхъужъэу Цэй Эдуардрэ.

УФ-мрэ Республикэу Къыблэ Осетиемрэ яшъолъыр заулэмэ ялIыкIохэри мэфэкIым хэлэжьагъэх. Республикэм ихьакIэхэмрэ ащ щыпсэухэрэмрэ Абхъазым и Пре­зидентэу Аслан Бжания япащэу 1992 – 1993-рэ илъэсхэм Абхъазым щыкIогъэ Хэгъэгу заом щыфэхыгъэхэм ямыжъосын къэгъагъэхэр кIэлъыралъхьагъэх.

А мэфэ дэдэм Абхъазым и Апэрэ Президентэу Владислав Ардзинба Iофтхьабзэм хэла­жьэ­хэрэм агу къагъэкIыжьыгъ. Къуа­джэу Нижняя Эшера дэт мыжъосынэу къэралыгъо IофышIэшхом ыцIэкIэ агъэцугъэм къекIолIагъэх правительствэхэм ыкIи общественнэ движение зэфэшъхьафхэм ялIыкIохэр, къэ­гъагъэхэр ащ кIэлъыралъхьагъэх ыкIи зы такъикърэ фэшъыгъуагъэх.

Республикэм икъэлэ шъхьаIэ дзэ парад щыкIуагъ. Шъхьафитныгъэм игупчэ къырыкIуагъэх ветеранхэмрэ Абхъазым идзэ подразделениехэмрэ. Республи­кэм и Президентэу Аслан Бжания ипсалъэ къызэрэщыхигъэщыгъэмкIэ, Кавказым щызэхэщэгъэ движение зэфэшъхьафхэм ахэтхэу яхэгъэгу къаухъумэнымкIэ IэпыIэгъушхо къафэхъугъэхэр егъашIэми абхъазхэм ащыгъу­пшэщтхэп.

МэфэкIым тегъэпсыхьагъэу Адыгеим, Къэбэртэе-Бэлъкъарым ыкIи Къэрэщэе-Щэрджэсым ялIыкIохэу Абхъазым къэкIуагъэ­хэм зэIукIэгъухэр адыряIагъэх. Абхъазым и Президент шъолъыр­хэм япащэхэм анаIэ къызэратырагъэтырэм, абхъазхэм гущыIэ фабэхэр къызэрафаIуагъэ­хэм апае инэу зэрафэразэр къы­Iуагъ.

«Илъэс 30-кIэ узэкIэIэбэжьмэ щыIэгъэ хъугъэ-шIагъэхэм Урысыемрэ Кавказымрэ ащыпсэухэ­рэм хэушъхьафыкIыгъэ чIыпIэшхо ащаубытыгъ. Титарихъ гъогу зэу зэрэщытыр, тызэрэзэкъошыр, зыкIыныгъэ зэрэтхэлъыр джыри зэ ащ къегъэшъыпкъэжьы. КъыткIэхъухьэхэрэми а зэфыщытыкIэхэр алъыдгъэIэсын, ахэтлъхьан фае. ТапэкIи тизэдэ­лэжьэныгъэ нахь зедгъэушъобгъущт. ЗэкIэми сышъуфэлъаIо мамыр щыIакIэ шъуиIэнэу, шIоу щыIэр къыжъудэхъоу шъупсэунэу», — къыIуагъ Аслан Бжания.

Урысыем Абхъазым ишъхьафитныгъэ зэрэдыригъэштагъэм тарихъ мэхьанэ зэриIэр, хэгъэ­гуи­тIумэ язэдэлэжьэныгъэ, язэ­фыщытыкIэ тапэкIи ащ нахь зэригъэпытэщтым ицыхьэ зэрэтелъыр Адыгеим и ЛIышъхьэ къыIуагъ.

«ЩыIэныгъэм къызэригъэлъэ­гъуагъэмкIэ, абхъазхэм къарыкIощтымкIэ гъогоу къыхахыгъэр, Урысые Федерацием зыдыригъэ­штагъэр гъогу тэрэз закъоу щы­тыгъ. Непэ Абхъазыр мамыр­ныгъэ зэрылъ, ыпэкIэ лъыкIо­тэрэ хэгъэгоу щыт. Тэ ренэу тышъуи­гъус ыкIи абхъаз лъэпкъым ищыкIэгъэ IэпыIэгъу еттыным тыфэхьазыр. ГъунэгъушIу зэфыщытыкIэхэмкIэ Абхъазым ипащэхэм щысэшIоу къагъэлъагъо­рэм пае инэу тафэраз. Лъэ­ныкъо пстэумкIи тизэдэлэжьэныгъэ зедгъэушъобгъуным мэхьанэшхо иIэу сэлъытэ, Iофэу зэдэдгъэцакIэхэрэм шIуагъэу къатырэри тишъолъырхэм ащы­псэухэрэм зэхашIэ», — къы­Iуагъ КъумпIыл Мурат.

Ащ нэужым Урысыем ишъо­лъырхэм къарыкIыгъэхэр культурэ мэхьанэ зиIэ Iофтхьабзэхэм ахэлэжьагъэх, Абхъазым ипащэхэм ягъусэхэу IофшIэнымкIи, культурэм ылъэныкъокIэ зэдэлэжьэныгъэу азыфагу тапэкIэ илъыщтымкIи гухэлъхэр агъэнэфагъэх.

АР-м и ЛIышъхьэ ипресс-къулыкъу