АР-м и Къэралыгъо Совет — Хасэм идепутатхэм зыгъэпсэфыгъо уахътэм ыуж апэрэ зэхэсыгъо тыгъуасэ яIагъ. Ар я XXVIII-рэ хъугъэ. Ар зэрищагъ Парламентым и Тхьаматэу Владимир Нарожнэм.

«Бжыхьэ сессиемкIэ» апэрэ зэхэсы­гъом иповесткэ упчIэ 60 фэдиз хэтыгъ. АР-м и ЛIышъхьэ ыкIи министрэхэм я Кабинет кIэщакIо афэхъугъэхэу хэбзэгъэ­уцугъэ 20-мэ япроектхэм депутатхэр ахэплъагъэх. Ахэм ащыщэу 18-р законкIэ аштагъ, 2-р апэрэ еджэгъум пхырыкIыгъэх.

Ахэм зэу ащыщ УФ-м и Президент хэушъхьафыкIыгъэ дзэ операцием хэлажьэхэрэм IэпыIэгъу ятыгъэным фытегъэпсыхьэгъэ унашъоу къышIыгъэм игъэцэкIэн пае аштэгъэ хэбзэгъэуцугъэр. ДзэкIолIхэм, зэзэгъыныгъэкIэ къулыкъу зыхьыхэрэм, УФ-м и УIэшыгъэ КIуачIэхэм пшъэрылъэу яIэхэм ягъэцэкIэн хэлажьэхэрэм, Урысыем и Лъэпкъ гвардие хэтхэм ыкIи ахэм яунагъохэм чIыгу Iахьхэр ятыгъэнхэм ар фэгъэхьыгъ. Къэ­ралыгъо ыкIи муниципальнэ мылъкум е Адыгэ Республикэм ыгъэфедэнэу къыфагъэзэжьыгъэм чIыгу Iахьхэр къыхэхыгъэнхэу ащ къыщеIо.

Ащ нэмыкIэу къэлэгъэпсыным, къэралыгъо граждан къулыкъум, цIыфыбэ зыхэлэжьэрэ Iофтхьабзэхэм язэхэщэн, гъэсэныгъэм исистемэ, къыдэгъэкIынымкIэ политикэм, таксихэм яIофшIэн, сабы­ибэ зэрыс унагъохэм чIыгу Iахьхэр ятыгъэнхэм, транспортым пае хэбзэIахьхэм ятын, фэтэрыбэу зэхэт унэхэм ачIэс­хэм зэдагъэфедэхэрэм ягъэцэ­кIэ­жьын, гъомылапхъэ зыхашIыкIырэ лэжьыгъэ къэзыгъэкIыхэрэм, хьалыгъу ыкIи нэмыкIэу хьаджыгъэм хэшIыкIыгъэхэр къэзышIыхэрэм къэралыгъо IэпыIэгъу ятыгъэным, нэмыкIхэм афэгъэхьыгъэ хэбзэгъэуцугъэхэм зэхъокIыныгъэхэр афэшIыгъэнхэм фэгъэхьыгъэ законхэм, законопроектхэм атегущыIагъэх, аштагъэх.

Федеральнэ къулыкъухэм афэгъэзэгъэ джэпсэлъи 4 мы зэхэсыгъом щаштагъ. Сэкъатныгъэ зиIэхэм афэгъэхьыгъэ хэбзэгъэуцугъэм къыдыхэлъытагъэу къэбзэныгъэм фытегъэпсыхьэгъэ пкъыгъоу ыпкIэ хэмылъэу къаратыхэрэм яшапхъэ нахьыбэ шIыгъэнэу къызщиIорэр УФ-м и Правительствэ и Тхьаматэ игуадзэу Татьяна Голиковам фэгъэзагъ. УФ-м мэкъумэщ хъызмэтымкIэ иминистрэу Дмитрий Патрушевым, ветеринарнэ ыкIи фитосанитарнэ шапхъэхэм ягъэцэкIэн лъыплъэгъэнымкIэ Федеральнэ къулыкъум ипащэу

Сергей Данкверт, УФ-м экономикэ хэхъоныгъэмкIэ иминистрэу Максим Решетниковым афэгъэ­загъэх бизнес цIыкIум ыкIи гурытым IэпыIэгъу ятыгъэным, уц шIоеу, хьацIэ-пIацIэу цIыфхэм ыкIи лэжьыгъэхэм зиягъэ язгъэкIыхэрэм апэшIуекIорэ Iофтхьабзэхэр зымыгъэцакIэхэрэм, мэз сатырхэм зэрар къафэзыхьыхэрэм, зыгъэкIодыхэ­рэм, мэкъумэщ хъызмэтым ичIыгухэр къэухъумэгъэнхэм, язытет нахьышIу шIыгъэным фытегъэпсыхьэгъэ шэпхъэ гъэнэфагъэхэр Iэпэдэлэл зышIыхэрэм тазырэу атыралъхьэрэр нахьыбэ шIыгъэ­ным афэгъэхьыгъэхэр.

Джащ фэдэу АР-м и Апшъэрэ хьыкум къыгъэлъэгъуагъэу Зарина Коноваловар Тэхъутэмыкъое районым ихьыкум участкэу N 3-м изэгъэшIужь хьыкумышIэу гъэнэфэгъэныр депутатхэм игъоу алъэгъугъ.

Зэрэхабзэу зэхэсыгъом икIэухым, Урысыем инэмыкI шъолъырхэм яхэбзэихъухьэ къулыкъухэр кIэщакIо зыфэхъу­гъэхэм атегущыIагъэх, адырагъэштагъ.

ХЪУТ Нэфсэт.