Iоныгъо мазэр фабэу ыкIи гъушъэ дэдэу икIыгъ. Мы мазэм фабэу щыIэу хабзэм градуси 2-кIэ нахьыбагъ мыгъэрэ Iоныгъор, ощхыр мэкIэ дэдагъ, щыIэгъа­хэп пIоми хъущт, къещхын фэягъэм ызыщани тлъэгъугъэп. Ары машIом зыкъыштэным ищынагъо ренэу зыкIыщыIагъэр. Ащ имызакъоу, шышъхьэIум и 17-м къыщыублагъэу непэ къызынэсыгъэм ощх тэрэз къызэремыщхыгъэм къыхэкIэу чIыгум шынэгъакIэу иIэм лъэшэу къыщыкIагъ, псыхъохэм адэт псыри бэкIэ нахь макIэ хъугъэ.

Чъэпыогъу мазэу къытфихьэрэр бжыхьэм ыгузэгу. Сыд фэдэщта мы мазэр? «Чъэпыогъум мафэм блэгъо­гогъо зызэблехъу» аIо цIыфхэм. АдыгеимкIэ чъэпыогъур дышъэ бжыхьэ шъыпкъ. Илъэс къэс мы мазэм ыгузэгухэм адэжь хэпшIыкIэу къэучъыIы. Апэрэ мэфэ чъы­Iэхэм ауж тхьамаф-тхьамэфитIу пIалъэкIэ фабэм къегъэзэжьы — «бабье лето» зыфаIорэ мафэхэр къехьэх. Джащыгъум фабэр градус 30-м ехъун ылъэ­кIыщт. Мыщ фэдэ лъэхъаным температурэр градус 36,7-м нэсыгъэу агъэунэфыгъагъ 1998-рэ илъэсым. Чъэпыогъу анахь чъы­Iэр зыщыIагъэр 1946-рэ илъэ­сыр ары — чъыIэр градус 13,8-м нэсыгъагъ.

Чъэпыогъум фабэу щыIэщтыр шапхъэ­хэм ашIокIыщтэп, ощхыр мэзэ шапхъэ­хэм афэдизыщт, ашIокIыни ылъэкIыщт. Мазэм иапэрэ мэфэ 15-м шыблэ зыхэт ощхыхэр щыIэщтых, ятIонэрэ мэзэ ныкъом — ощхым жьыбгъэ чъыIэ хэтэу. Къушъхьэлъэ чIыпIэхэм ос цIынэ къащесын ылъэкIыщт.

Мазэм иапэрэ мэфипшIым чэщым фабэу градуси 9 — 11 щыIэщт, мафэм — 16 — 21-рэ, градус 26 — 28-м зыщынэсырэ мафэхэри къыхэкIыщтых.

ЯтIонэрэ мэфипшIым — чэщым градуси 7 — 12, мафэм 15 — 20, градуси 5 — 15 нахь зыщымыIэщт мафэхэри къыхэфэщтых.

Ящэнэрэ мэфипшIым чэщым фабэу щыIэщтыр градуси 4 — 9, къушъхьэлъэ чIыпIэхэм чъыIэр градус 1 — 4, мазэм ыкIэхэм адэжь чъыIэр градуси 6 — 11-м ащынэсыщт.

Лъэшэу къызыщещхырэ мафэхэм псыхъохэм адэт псым зыкъыIэтын ылъэ­кIыщт. Губгъохэм Iоф ащыпшIэн умылъэ­кIыным ищынагъо щыIэщтэп.

ГидрометеорологиемкIэ ыкIи тыкъэзыуцухьэрэ дунаим изытет иуплъэкIункIэ Гупчэм ипащэу Александр Митровыр.