Урысые Iофтхьабзэу «ЩыIэныгъэм екIурэ лъэбэкъу минипшI» зыфиIорэм Адыгэ Республикэр хэлэжьагъ.

Iофтхьабзэм кIэщакIо фэхъугъ къэралыгъом иобщественнэ организациеу «Лига здоровья нации» зыфиIорэр. Ар гум ыкIи лъэс зекIоным я Дунэе мафэхэм афэгъэхьыгъагъ, цIэу фаусыгъэр «От сердца к сердцу».

Урысыем ишъолъырхэр, къэлэ зэфэшъхьафхэр, муниципалитетхэр Iофтхьабзэм хэлэжьагъэх, зэкIэмкIи нэбгырэ миллион фэдиз.

Урысые Iофтхьабзэу «ЩыIэныгъэм екIурэ лъэбэкъу минипшI» зыфиIорэм пшъэрылъ шъхьаIэу иIэр лъэс зекIоным пыщагъэхэм, зипсауныгъэ зыгъэпытэн гухэлъ зиIэхэм япчъагъэ хэгъэхъогъэныр, ащ дакIоу гу-лъынтфэ узхэм пэшIорыгъэшъэу ащыухъумэгъэнхэр ары.

Адыгеим имуниципалитетхэм ащыщхэм ялIыкIохэм Iофтхьабзэм зыщаушэтыгъ. Мыекъуапэ пштэмэ, мы акциер яплIэнэрэу щырагъэкIокIыгъ ыкIи ащ нэбгырэ 92-рэ хэлэжьагъ.

Ахэм аныбжь илъэсым щегъэжьагъэу 70-м ехъум нэс. Ахэм зэкIэми Мыекъуапэ физическэ культурэмкIэ ыкIи спортымкIэ и Комитет ыгъэнэфэгъэ пшъэрылъыр агъэцэкIагъ, гупчэу «Зэкъошныгъэм» къыщырагъажьи къэлэ паркым нэс лъэсэу къэкIуагъэх. Япсауныгъэ агъэпытагъ.

Мыщ фэдэ Iофтхьабзэу Красногвардейскэ ыкIи Теуцожь районхэм, Адыгэкъалэ ащыкIуагъэхэм цIыфыбэ ахэлэжьагъ.