Урысые кIэлэцIыкIу Гупчэу «Орленкэм» щыкIорэ Урысые сменэу «Юный математик» зыфиIорэм мыгъэ апэрэу Луганскэ ыкIи До­нецкэ народнэ республикэхэм къарыкIыгъэ кIэлэеджакIохэр хэла­жьэх. ДНР-м къикIыгъэ кIэлэеджэкIо 15-мэ ыкIи ЛНР-м щыщ 14-мэ загъэпсэфы ыкIи яшIэныгъэхэм ахагъахъо.

Урысыем ишъолъырыкIэхэм къарыкIыгъэ ныбжьыкIэхэм яегъэджэн мэхьанэшхо раты. ШIэныгъэ зэрэзэрагъэгъотырэм имызакъоу гъэсэныгъэ модульхэр акIух, ащ ишIуагъэкIэ ханэгъэ шIэныгъэхэр акIужьых ыкIи ялэгъухэм акIэхьажьых. Урысые гъэсэныгъэ проектэу «Школ­ково» зыфиIорэм икIэлэегъаджэхэр ары ныбжьыкIэхэм Iоф адэзы­шIэхэрэр. Джащ фэдэу ДНР-м, ЛНР-м къарыкIыгъэ кIэлэеджа­кIохэр къыблэ федеральнэ зэнэ­къокъум хэлажьэх, ахэм «Новая лига» зыфиIорэр афызэхащагъ.

— НэмыкI кIэлэцIыкIухэм афэдэу ЛНР-м ыкIи ДНР-м ащыщ кIэлэцIыкIухэм зэрифэшъуашэу шIэныгъэ зэрагъэгъотын амал бэрэ яIагъэп. Ахэм яшIэныгъэхэр зэтедгъэуцожьынхэр, Iофтхьэбзэ зэфэшъхьафхэм ахэдгъэлэжьэнхэр ары типшъэрылъыр. Дунэе ыкIи Урысые мэхьанэ зиIэ проектхэу тиапшъэрэ еджапIэ зэхищэхэрэм шъолъырыкIэхэм ащыщ кIэлэеджакIохэр, студентхэр къыхэтэгъэлажьэх, — къыIуагъ Адыгэ къэралыгъо универ­ситетым иректорэу Мамый Даутэ.

Нэужым ректорыр ныбжьыкIэхэм гущыIэгъу афэхъугъ, ашIогъэшIэгъон лъэныкъохэр къыраIуагъэх.

Урысые сменэу «Юный математик» зыфиIорэр 2005-рэ илъэсым къыщегъэжьагъэу «Орленкэм» щызэхащэ. А уахътэм къыкIоцI хэгъэгум ишъо­лъыр 50-мэ къарыкIыгъэ кIэлэеджэкIо мини 2-м ехъу ащ хэлэжьагъ. Адыгэ къэралыгъо университетым и Кавказ хьисап гупчэрэ Урысые кIэлэцIыкIу гупчэу «Ор­ленок» зыфиIорэмрэ сменэм кIэщакIо фэхъугъэх. Москва дэт физикэ-техническэ институтыр, шIэныгъэмкIэ Урысые академием ихьисап институтэу В. А. Стек­ловым ыцIэ зыхьырэр, республикэ естественнэ-хьисап еджапIэр ыкIи Урысые гъэсэны­гъэ проектэу «Школково» зыфиIорэр программэм икIэщакIох.

Сменэр мэфэ 21-рэ кIощт. Программэм къыдыхэлъытагъэу кIэлэцIыкIухэм хьисапымкIэ яшIэ­ныгъэхэм ахагъэхъощт.

Адыгэ къэралыгъо университетым ипресс-къулыкъу.