МыIэрысэм иIухыжьын джыдэдэм республикэм щыжъот.

МыIэрысэ чъыгхатэхэмкIэ Адыгеир ренэу баигъ, непэ мыIэрысэ лъэпкъ зэфэшъхьафыбэ къагъэкIы: флорина, айдаред, делишес, голдстар, голден, нэмыкIхэри.

«ТихъызмэтшIапIэхэм япродукцие нэмыкIхэм ашъхьадэкIын елъэкIы. Къушъхьэ жьы къабзэмрэ экологие дэгъумрэ яшIуагъэ­кIэ пшхынкIэ лъэшэу ахэр гохьых.

Чъыгхатэхэм адэлэжьэгъэным фэ­гъэзэ­гъэ предприятиехэм ягъэ­­хъагъэхэм нафэ къашIы чIыгулэжьыным пылъ шъолъырыр пхъэшъхьэ-мышъхьэхэмрэ цумпэхэмрэ нахь афытегъэпсыхьагъэу шIыгъэным истратегиеу къыхэтхыгъэр зэрэтэрэзыр», — Адыгеим и ЛIышъ­хьэу КъумпIыл Мурат социальнэ хъытыу­хэм къаригъэхьагъ.

Непэ мыIэрысэ чъыгхэм гектар мини 4,2-м ехъу аубыты, ащ щыщэу мин 1,9-р псынкIэу зигъо хъухэрэм аубыты. Чъыг­хатэхэм янахьыбэм мыIэрысэр къапачэу рагъэжьагъ, мыщ дэжьым техно­логия­кIэхэу агъэфедэхэрэм лэжьыгъэр нахь бэгъонымкIэ яшIуагъэ къызэрэкIорэр къыхэгъэщыгъэн фае.

2019-рэ илъэсым къыщыублагъэу пхъэшъхьэ-мышъхьэхэу ыкIи цумпэ лъэпкъ зэфэшъхьафхэу къаугъоирэр процент 75-кIэ нахьыбэ хъугъэ, 2022-рэ илъэсым тонн мин 44,35-рэ Iуахыжьыгъ. Мы илъэсым лэжьыгъэ бэгъуагъэ къахьыжьынэу мэгугъэх. Тонн мин 12,6-рэ фэдиз къаугъоигъах, ахэм ащыщэу гъэмафэм зигъо хъурэ мыIэрысэхэр тонн 11-м нэсых. ХъызмэтшIапIэхэр бжыхьэ мыIэрысэ лъэпкъхэм яугъоижьын фежьагъэх.

«ТапэкIи хъызмэтшIэпIэ пэрытэу тиIэ­хэм тишIуагъэ ядгъэ­кIыщт. НэмыкIхэм янэ­къокъун амал яIэным пае продукцием идэ­гъу­гъэ къыкIимычыным, техноло­гиякIэхэр гъэфедэгъэнхэм ыкIи Iофым научнэ екIолIакIэ фыряIэным мэхьанэ­шхо яIэу щыт», — къыхигъэщыгъ КъумпIыл Мурат.