Абхъаз Республикэр шъхьафит зашIыжьыгъэр илъэс 30 зэрэхъурэр непэ ащ щыхагъэунэфыкIы. МэфэкIыр ткъош республикэм дагощынэу еблэгъагъэх Адыгэ Республикэм и ЛIышъхьэу КъумпIыл Муратрэ Урысыем и ЛIыхъужъэу, Адыгэ Республикэм и Къэралыгъо Совет – Хасэм и Тхьаматэ игуадзэу Цэй Эдуардрэ.

—  Тиреспубликэхэм мы мафэр зэдырямэфэкI, —  къыIуагъ Адыгеим и ЛIышъхьэ, —  ыкIи непэ ткъошхэм тигуапэу ар адэтэIэты. Илъэс 30-кIэ узэкIэIэбэжьмэ Абхъазыр шъхьафит хэхъоныгъэм игъогу техьагъ. Ар осэшхокIэ къыдихыгъ, ау абхъаз лъэпкъым ипытагъэрэ изэкъотныгъэрэ яшIуагъэкIэ ичIыгу гупсэ къырыкIощтыр зыми емыпхыгъэу ыухэсын фитыныгъэр къызIэкIи­гъэхьагъ. Джа лъэхъаным Адыгеир икъошхэм акъоуцуагъ. Тиреспубликэ икIыхи ежь яшIоигъоныгъэкIэ нэбгыри 180-рэ абхъазхэм акъоуцонхэу кIогъагъэх. Мы илъэс пчъагъэхэм тиреспубликэхэр зэгъусэхэу тилIыхъужъхэм яшIэжь агъэлъапIэ.

Непэ Абхъазым хэхъоныгъэхэр иIэхэу, Урысыем ишъолъырхэу зыдэлажьэхэрэм япчъагъэ нахьыбэ ышIызэ ыпэкIэ зэрэлъыкIуатэрэр Адыгеим и ЛIышъхьэ къыхигъэщыгъ. ТапэкIи зэрэзэдэлэ­жьэщтхэм зыщытегущыIэгъэхэ зэIукIэу Абхъазым и Президентэу Аслъан Бжания, Адыгеим ыкIи Къэбэртэе-Бэлъкъарым я ЛIышъхьэхэу КъумпIыл Муратрэ КIокIо Казбекрэ, Къэрэщэе-Щэрджэсым и Парламент и Тхьаматэу Александр Ивановыр зыхэлэжьагъэхэр зэхащагъ.

—  Сицыхьэ телъ зэкъошныгъэмрэ зэгурыIоныгъэмрэ тлъапсэхэу, ащкIэ тыщысэтехыпIэу Урысыемрэ Абхъазымрэ ащыпсэухэрэм яфедэхэр къыдэтлъытэхэзэ, тапэкIи тызэрэзэдэлэжьэщтым, — къыщыкIигъэтхъыгъ игущыIэ КъумпIыл Мурат.

Абхъаз Республикэм имэфэкI зэрэ­кIуа­гъэм ыкIи Адыгеим и ЛIышъхьэ ащ зэрэхэлэжьагъэм афэгъэхьыгъэ къэбар игъэкIотыгъэ тикъыкIэлъыкIорэ къыдэкIыгъо итыщт.