Непэ къыщыублагъэу Урысыем ишIэжь мафэхэм джыри зы къахэ­хъуагъ — Донецкэ ыкIи Луганскэ На­род­нэ республикэхэр, Запорожскэ ыкIи Херсонскэ хэкухэр Урысыем къыз­щы­хэ­хьажьы­гъэхэ мафэу Iоны­гъом и 30-р гъэнэфэгъэным фэгъэ­хьыгъэ хэбзэгъэуцугъэр УФ-м и Къэ­ра­лыгъо Думэ зичэзыу зэхэсыгъоу Iоныгъом и 19-м иIагъэм щаштагъ. Ащ и Тхьаматэу Вячеслав Володиным къызэриIуагъэмкIэ, хэбзэгъэуцугъэм кIэщакIо фэхъугъэр ыкIи тегущыIэнхэу къыхэзылъхьагъэр УФ-м и Президентэу Владимир Путиныр ары. —  Мы шъолъырхэм ащыпсэухэрэр илъэс пчъагъэ хъугъэшъ яныдэлъ­фыбзэкIэ гущыIэнхэу фитыныгъэ яIэным, ятарихъ, ядин, якультурэ къызэтегъэнэжьыгъэнхэм фэбанэх. Мафэу ахэр ядэжь къызщыкIожьыгъэхэр лъэпкъым ишIэжь егъашIэм хэтынэу щыгъэнэфэгъэныр игъо дэд, — къыкIигъэтхъыгъ Думэм и Тхьаматэ. 2022-рэ илъэсым иIоныгъо мазэ и 30-р мы шъолъыриплIыр Урысые Федерацием исубъектхэм захигъэхьэгъэ мафэу тарихъым къызэрэхэнэжьыщтыр, ахэм цIыфэу ащыпсэухэрэм яфиты­ныгъэхэр, яшъхьафитныгъэ агъэфедэн­хэм, яполитическэ статус зыпари къыхэмыгущыIэу ежьхэм агъэнэфэн амал яIэным, экономическэ, социальнэ ыкIи культурнэ хэхъоныгъэхэр ашIынхэм зэрафэбэнагъэхэм ар къызэрэкIэкIуагъэр хэбзэгъэуцугъэм ипроект къыщыхэ­гъэщыгъ. Непэ шIэжь мэфакIэм фэгъэхьыгъэ Iофтхьэбзэ зэфэшъхьафхэр  Адыгеим щыкIощтых. Къэлэ шъхьаIэр тштэмэ,  творческэ купхэм концертхэр къыща­тыщтых, сурэтышIхэм яIофшIагъэхэу Урысыем изыкIыныгъэ фэгъэхьыгъэхэр къагъэлъэгъощтых, спорт зэнэкъокъухэри зэхащэщтых. Iофтхьэбзэ анахь шъхьа­Iэхэм ащыщ хъущт «Шъолъыр 89-рэ» зыфиIоу  Мэздахэ екIурэ дэкIояпIэм щы­кIощтыр – пчъагъэу 89-р къагъэлъагъоу волонтерхэр ащ къыщызэхэуцощтых. Iофтхьабзэр мафэм сыхьатыр 4-м рагъэкIокIыщт.