Имэхьанэ къаIэтыжьы
Апэрэ фестивалэу «ДжэгуакIо» зыфиIорэр тыгъуасэ Красногвардейскэ районым ит къуаджэу Улапэ культурэм и Унэу дэтым щыкIуагъ.
ЦIыфыбэ ащ къыщызэрэугъоигъагъ. Адыгэ нысэщэ джэгум къыдилъытэрэ ижъырэ хабзэхэр мыщ щызэрахьагъэх, пстэуми ашIогъэшIэгъоныгъ джырэкIэ амыгъэфедэжьырэ «ачъэгъашъокIэ» заджэщтыгъэхэу къагъэлъэгъуагъэр.
Адыгэ джэгур зыфэдэн фаер, хьатыякIом пшъэрылъэу иIэхэр район зэфэшъхьафхэм къарыкIыгъэ купхэм къагъэлъэгъуагъ. ЗэкIэмкIи купи 5 фестивалым хэлэжьагъэр, ахэр Шэуджэн, Кощхьэблэ, Тэхъутэмыкъое, Теуцожь районхэм ыкIи Улапэ щыщых.
Адыгэ джэгу шъыпкъэм фэдэу къэгъэлъэгъонхэр къашIыгъэх, нысэр къызэращэрэр, зэрэлъэхахьэхэрэр, джэгур къызэрэзэIуахырэр, нысэм ищыгъынхэр къызэрахьыжьхэрэр ыкIи нэмыкI шэн-хэбзэ дахэу тиIэхэр къизыIотыкIырэ къэгъэлъэгъонхэр къашIыгъэх. ГущыIэ щэрыохэр агъэфедэхэзэ хьатыякIохэм джэгур зэращагъ, Iофтхьабзэм къекIолIагъэхэр къагъэшъуагъэх.
ДжэгокIо тхьаматэу агъэнэфагъэр Шэуджэн районым къикIыгъэ Быщтэкъо Адам.
Iофтхьабзэм хэлэжьагъэх АР-м культурэмкIэ иминистрэ игуадзэу Кушъу Светланэ, Красногвардейскэ районым ипащэу Гъубжьэкъо Темур, Адыгэ къэралыгъо университетым адыгэ филологиемрэ культурэмрэкIэ ифакультет иIофышIэхэу, шIэныгъэлэжьэу Унэрэкъо Рае, идоцентэу, тарихъ шIэныгъэхэмкIэ кандидатэу Цэй Заремэ, сэкъатныгъэ зиIэхэм я Урысые обществэ и Адыгэ республикэ организацие ипащэу Агъыржьэнэкъо Симэ, КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэу Мыекъуапэ дэтым ипащэу ШъэуапцIэкъо Аминэт, къоджэдэсхэр, ныбжьыкIэхэр, нэмыкIхэри.
ДжэгуакIом мэхьанэу иIэм зыкъегъэIэтыжьыгъэныр, тарихъым, адыгэ хабзэм атетэу къыткIэхъухьэхэрэр пIугъэнхэр, адыгагъэ ахэлъыным фэщэгъэнхэр ары зэхэщакIохэм пшъэрылъ шъхьаIэу зыфагъэуцужьыгъэр.
Фестивалыр зэрэкIуагъэм фэгъэхьыгъэ игъэкIотыгъэ тхыгъэ къыкIэлъыкIорэ номерым къихьащт.
ДЕЛЭКЪО Анет.
Сурэтыр авторым ий.