КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэу Мыекъуапэ дэтым адыгэ шъуашэм и Мафэ фэгъэхьыгъэ игъэкIотыгъэ мэфэкI программэ хьакIэхэм къафигъэхьазырыгъ, ар Iахь заулэу зэтеутыгъагъ.

МэфэкIым ипэублэм къэзэрэу­гъоигъэхэм арагъэлъэгъугъэх Адыгэ Республикэм идизайнер пэрытхэм ашIыгъэ адыгэ шъуашэхэр. Модельерхэу Мыгу Рузанэ, Пэрэныкъо Рузанэ, Блэгъожъ Зулифа, АкIущ Фатимэ ыкIи ХъокIо Рузанэ яIофшIагъэхэр къагъэлъэ­гъуагъэх.

Нэбгырэ пэпчъ иIофшIагъэ ыпсэ щыщ Iахь хилъхьагъ, гъэшIэрэ лъэпкъ шъуашэр непэрэ уахътэм зэрэдырагъэштэщтым пылъыгъэх. Адыгэ саер шIыкIэ зэфэшъ­хьафыбэу къагъэлъэгъон алъэкIыгъ, ахэм ащыщыгъ дунаимкIэ хъэгъэ сэе закъоу Блэгъожъ Зулифа къыгъэхьазырыгъэр. Модельерым иIофшIагъэ адыгэ лъэпкъым фигъэхьыгъ, ащ итарихъ, лIыхъужъныгъэу зэрихьагъэхэм.

Къэгъэлъэгъонхэм къакIэлъыкIоу су­рэт­­техынымкIэ зэнэкъокъоу адыгэ лъэпкъ шъуашэм и Мафэ ипэгъокIэу зэха­щэгъагъэм зэфэхьысыжьхэр фашIы­гъэх. Аужырэ тхьамэфэ заулэхэм адыгэ шъуашэр ащыгъэу атырахыгъэ сурэт­хэмкIэ Адыгеим щыпсэухэрэр зэхъо­жьыщтыгъэх, зэкIэмкIи зэнэкъокъум сурэт 250-рэ къырахьылIагъ. Зэнэкъокъум анахь ныбжьыкIэу текIоныгъэр къыщы­дэзыхыгъэр ЛIымыгъэнэ Шъалихь ары. Джащ фэдэу шIухьафтынхэр аратыгъэх, къыхагъэщыгъэх Бэрэтэрэ Азэ, Тхьар­къуа­хъохэу Рузанэ, Мадинэ ыкIи Сафинэ, Хъуранэхэу Русетэрэ Мадинэрэ, Чэтыжъ­хэу Альбинэрэ Азмэтрэ.

А Iофтхьабзэхэм къакIэлъыкIуагъ Адыге­им искусствэхэмкIэ иIофышIэхэм къатыгъэ концертыр. Лъэпкъ орэдхэмкIэ ыкIи къашъохэмкIэ къэралыгъо ансамб­лэхэу «Ислъамыем», «Ошъутенэм», «Ащэ­мэзым», «Синдикэм», «Мыекъуапэ инэфылъэхэм», «Насыпым», орэдыIохэу Даутэ Сусаннэ, Хъуранэ Азэ, Аббэсэ Долэт мэфэкI Iофтхьабзэм хэлажьэхэрэр яплъыгъэх ыкIи ядэIугъэх.

Конструктор-модельерэу, АР-м куль­турэмкIэ изаслуженнэ IофышIэу, искус­ствэм ылъэныкъокIэ АР-м и Къэралыгъо шIухьафтын илауреатэу СтIашъу Юрэ фэгъэхьыгъэ зэхахьэмкIэ мэфэ­кIыр зэфашIыжьыгъ. Къыхэгъэщыгъэн фае мэфэкIыр зэлъашIэрэ модельерыр къызыхъугъэ мафэм тефэу хагъэунэ­фыкIынэу зэрэрахъухьэгъагъэр, мы мафэм ащ ыныбжь илъэс 92-рэ хъугъэ. ЗэхэщакIохэри хьакIэхэри СтIашъу Юрэ къыфэгушIуагъэх, ежьыри Iофтхьабзэм хэлажьэхэрэм зэрафэразэр, лъэпкъым игушъхьэбаиныгъэ къызэраухъумэрэр гопэшхо зэрэщыхъурэр къариIуагъ.