Заомрэ IофшIэнымрэ яветеранхэу, Адыгэ Республикэм инахьыжъхэу лъытэныгъэ зыфэтшIыхэрэр!

Зыныбжь хэкIотагъэхэм я Дунэе мафэ фэшI тыгу къыддеIэу тышъуфэгушIо!

Тинахьыжъ лъапIэхэу чанэу Iоф зышIагъэхэм, заом лIыхъужъныгъэ щызезыхьагъэхэм, тихэгъэгу ихэхъоныгъэ зиIахьышIу хэзышIыхьагъэхэм лъэшэу тызэрафэразэр, лъытэныгъэшхо зэрафэтшIырэр мы мафэм къэтэIо.

Псэемыблэжьныгъэу, лIыгъэу, цIыфыгъэшхоу шъу­хэлъымкIэ, шъузышъхьамысыжьэу шъуиреспубликэ гупсэрэ шъуилъэпкърэ шъузэрафэлажьэрэмкIэ ренэу щысэтехыпIэу шъутиI.

Гъэхъагъэхэр зиIэ тинахьыжъхэу Хэгъэгу зэошхом илъэхъан лIыгъэ зезыхьагъэхэм лъэшэу тарэгушхо, такIырэплъы. Анахьэу тиджырэ лъэхъан а пстэуми мэхьанэшхо зыкIяттырэр тихэгъэгу джыри ишъхьафитыныгъэрэ изыкIыныгъэрэ афэбэнэн фаеу непи мэ­хъушъ ары.

Тинахьыжъхэу лъытэныгъэ зыфэтшIыхэрэр! Шъуи­опыткIэ, шъуишIэныгъэкIэ ныбжьыкIэхэм хьалэлэу шъузэрадэгуащэрэм, лъэпкъ хабзэхэр чIамынэнхэм шъузэригъэгумэкIырэм афэшI лъэшэу тызэрэшъуфэразэр мы мафэм къэтэIо.

Псауныгъэ пытэ шъуиIэнэу, шъуигъашIэ кIыхьэ хъунэу, жъышъхьэ мафэ шъухъунэу, шъуигупсэхэмрэ шъуиIахьылхэмрэ ягуфэбэныгъэ шъущымыкIэнэу тышъуфэлъаIо!

Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат

Адыгэ Республикэм и Къэралыгъо Совет —Хасэм и Тхьаматэу Владимир Нарожнэр