Урысые Iофтхьабзэу «ЩыIэныгъэм екIурэ лъэбэкъу минипшI» зыфиIорэр чъэпыогъум и 1-м зэхащэщт. Iофтхьабзэр гум ыкIи лъэс зекIоным я Дунэе мафэхэм афэгъэхьыгъэщт, цIэу фаусыгъэр «От сердца к сердцу».

Хабзэ зэрэхъугъэу, Урысыем ишъолъырхэр, къэлэ зэфэшъхьаф­хэр, муниципалитет ыкIи нэбгырэ мин пчъагъэ Iофтхьабзэм хэлэ­жьэщтых. Мыщ зыщызыушэтынэу фаехэр зэхэщакIохэм рагъэблагъэх, ахэм сайтэу «www.ligazn.ru» зыфиIорэм зыщатхын алъэ­кIыщт. Илъэс къэс рагъэкIокIырэ акцием нэбгырэ миллион фэдиз зэрещалIэ. Урысые Iофтхьабзэу «ЩыIэныгъэм екIурэ лъэбэкъу минипшI» зыфиIорэм пшъэрылъ шъхьаIэу иIэр лъэс зекIоным пыщагъэхэм, зипсауныгъэ зыгъэпытэн гухэлъ зиIэхэм япчъагъэ хэгъэхъогъэныр, ащ дакIоу гу-лъынтфэ узхэм пэшIорыгъэшъэу ащыухъумэгъэнхэр ары. ЗэхэщакIохэм зэралъытэрэмкIэ, ар гъэцэкIэгъэнымкIэ нэбгырэ пэпчъ амалышIухэр иIэх, пшIэн фэе закъор укъэтэджынышъ, лъэсэу узекIоныр ары.

— Мы IофхьабзэмкIэ джыри зэ къэдгъэлъэгъо­нэу тыфай медицинэм имызакъоу, псауныгъэр зыгъэпытэщт амал пстэури нэбгырэ пэпчъ ыгъэфедэн зэрилъэкIыщтыр. Мыщ дэжьым къэ­ралыгъом ипшъэры­лъыр обществэм ишIуагъэ ригъэкIыныр ары. ЦIыфым ипшъэрылъ шъхьа­Iэр ипсауныгъэ зэригъэпытэщтым пылъын зэрэфаер къыгурыIозэ, ащ къе­кIолIэныр ары, — къыIуагъ РАН-м иакадемикэу, зэлъашIэрэ врачэу Лео Бокерия.

Iофтхьабзэм Адыгэ Республикэри хэлэжьэщт. Лъэс кIоныр зыгу рихьыхэрэр чъэпыогъум и 1-м мафэм сыхьатыр 4-м Мыекъуапэ игупчэу «Зэкъошныгъэм» щызэ­рэугъоищтых. Ащ хэлэжьэщтхэм ятхын сыхьатыр 3-м рагъэжьэщт.

КIэухым нэсыгъэхэм зэкIэми сертификатхэр ыкIи Мыекъуапэ физическэ культурэмкIэ ыкIи спортымкIэ и Комитет къыгъэхьазырыгъэ дипломхэр афагъэшъошэщтых.