ЛъэпкъыкIэхэр аушэтых
Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу урысые онлайн-олимпиадэу «Гъогу щынэгъончъэхэр» зыфиIорэр Iоныгъом и 19-м къыщегъэжьагъэу чъэпыогъум и 15-м нэс егъэджэн платформэу Учи.ру щэкIо. Адыгеим икIэлэеджакIохэри мыщ хэлэжьэнхэ амал яI.
Iофтхьабзэм кIэщакIо фэхъугъ ыкIи хэлэжьагъ АР-м мэкъумэщ хъызмэтымкIэ и Министерствэ. Тишъолъыр ичIыгулэжьхэри къырагъэблэгъагъэх.
— В.С.Пустовойтовым ыцIэ зыхьырэ шIэныгъэ-ушэтыпIэ институтэу дагъэ къэзытырэ культурэхэм апылъымрэ компаниеу «Соевый комплекс» зыфиIорэмрэ чылэпхъакIэхэр зытырахыгъэ «оригиналхэр» къэзыугупшысыгъэхэр ыкIи «къэзыгъэлъэгъуагъэхэр». Ахэр пстэумэ анахьэу тичIыопс ыкIи тичIыгухэм къякIущтхэу ары зэралъытэрэр, — къыщаIуагъ институтым.
ЧылэпхъакIэхэм яушэтын Мыекъопэ къэралыгъо технологическэ университетым мэкъу-мэщымкIэ ифакультет икIэлэегъаджэхэмрэ истудентхэмрэ хэлажьэх. Шапхъэ хъугъэ шIыкIэхэмкIэ лъэпкъыкIэхэр къагъэкIыгъэх. Лъэпкъ пэпчъ адрэхэм зэратекIырэр, узэрэдэзекIощтыр «Губгъом и Мафэ» хэлэжьагъэхэм къафаIотагъ, яупчIэхэм джэуапхэр къаратыжьыгъэх.
Джы ахэр Iуахыжьынхэшъ, уасэ къафашIынэу ары къэнагъэр. Джащыгъум куашэхэм зыкъызэраIэтырэм, къэгъагъэ къызэрэхъухэрэм уахътэу аштэрэр зыфэдизыр, ялъэгагъэ, цэ пчъагъэу арыхъорэр, нэмыкIхэр къыдалъытэщтых. ХъызмэтшIапIэу е къулыкъоу ащыщ ыгъэфедэмэ шIоигъоу къыкIэупчIэрэм лъэпкъыкIэ пэпчъ икъэбар фаIотэщт. Апшъэрэ еджапIэм къызэрэщаIуагъэмкIэ, тишъолъыр мыщ фэдэ IофшIэнхэр ищыкIэгъэ дэдэх. Сыда пIомэ тыгъэгъазэм исевооборот зэрэзэщыкъуагъэм чIыгум иягъэ регъэкIы. Ащ ычIыпIэ соер иуцомэ ишIуагъэ къэкIощт.
Мыекъопэ къэралыгъо технологическэ университетым мэкъумэщ хъызмэтымкIэ ишIэныгъэ-ушэтыпIэ институт ипащэ иIэнатIэ зыгъэцэкIэрэ Хьаткъо Казбек къызэриIуагъэмкIэ, тичIыгулэжьхэм сое лъэпкъыкIэхэм нэIуасэ зафашIынымкIэ, ежьхэмкIэ нахьышIу хъущтыр къыхахынымкIэ мыщ фэдэ Iофтхьабзэхэм яшIуагъэ къэкIо.
— Тишъолъыр имэкъумэщ хъызмэт щылажьэхэрэм Iофэу тшIэрэм анаIэ къытырадзагъ. Ахэм яшIоигъоныгъэхэр къыдэтлъытэхэзэ тапэкIи лъэпкъыкIэу тыздэлажьэхэрэм нахь зядгъэушъомбгъущт, — къыIуагъ ащ.