Лъэпкъ проектэу «Щынэгъончъэ ыкIи шэпхъэшIухэм адиштэ Гъогухэр» зыфиIорэм къыдыхэлъытагъэу, урысые онлайн-олимпиадэу «Гъогу щынэгъончъэхэр» зыфиIорэр Iоныгъом и 19-м къыщегъэжьагъэу чъэпыогъум и 15-м нэс егъэджэн платформэу Учи.ру щэкIо. Адыгеим икIэлэеджакIохэри мыщ хэлэжьэнхэ амал яI.

Мы зэнэкъокъум а 1 — 9-рэ классхэм ащеджэхэрэм гъогурыкIонымкIэ шIэныгъэу яIэхэм ахегъахъо. Олимпиадэм изэхэщакIох Урысыем транспортымкIэ и Министерствэ, УФ-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ игъэIорышIэпIэ ШъхьаIэ, мысатыушI акционер обществэу «Национальные приоритеты» зыфиIорэр. «Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфи­Iорэм ипшъэрылъ шъхьаIэхэм ащыщ гъогурыкIоным хэлэжьэрэ пстэуми ящы­нэгъончъагъэ зыкъегъэIэтыгъэныр. Гъо­гухэм къатехъухьэрэ хъугъэ-шIагъэхэр нахь макIэ шIыгъэнхэр пшъэрылъ шъхьа­Iэу зэрэщытым фэшI лъэпкъ мурадэу агъэнэфагъэхэм ахагъэхьагъ. Анахь мэхьанэ зиIэр кIэлэцIыкIухэм ящынэгъон­чъагъ ары. Мурадэу дгъэнэфагъэр дгъэ­цэкIэным фэшI гъогухэм язытет шапхъэ­хэм адиштэу зэтетэгъэпсыхьэх, инфраструктурэм зетэгъэушъомбгъу. Ащ пае технологиякIэхэр тэгъэфедэх. Ау щынэгъончъагъэр а зы лъэныкъор арэп зэп­хыгъэр. Мэхьанэ зиIэхэм ащыщ кIэлэцIыкIухэми, ны-тыхэми шапхъэхэр шIокI имыIэу агъэцэкIэнхэр. КIэлэеджакIохэм гъогурыкIонымкIэ шIэныгъэу зэрагъэгъо­тыгъэхэр агъэпытэнхэ амал олимпиадэм къаритыщт», — къыIуагъ УФ-м и Правительствэ и Тхьаматэ игуадзэу Марат Хуснуллиным.

ЫпшъэкIэ къызэрэщыхэдгъэщыгъэу, олимпиадэр егъэджэн платформэу Учи.ру. щэкIо. ГъэцэкIэнхэр ашIынхэм фэшI яунэе кабинеткIэ олимпиадэм инэкIубгъо ихьанхэу щыт. Зэнэкъокъум хэлэ­жьэнхэр рамыгъажьэзэ, апэ ежь-­ежьырэу унэм зыщаушэтын амал яI, ны-тыхэри къыхагъэлэжьэнхэ алъэкIыщт. Ныбжьым елъытыгъэу гъэцэкIэнхэр тIоу зэтеутыгъэх: а 1 — 5-рэ ыкIи я 5 — 9-рэ классхэм апае.

ПэIудзыгъэ олимпиадэр чъэпыогъум и 15-м нэс кIощт. Мыщ фэгъэхьыгъэ къэбарыр нахь игъэкIотыгъэу сайтэу национальныепроекты.рф ижъугъотэщт.