Адыгэ къэралыгъо университетым социальнэ технологиехэмкIэ ыкIи зекIонымкIэ ифакультет истудентхэм Iофтхьабзэу «Экоход 01» зыфиIорэр мы мафэхэм зэхащагъ. Паркэу «ТхьачIышхо» ар щыкIуагъ. Мы апшъэрэ еджапIэм ипроектэу «Адыгеир – псауныгъэм ишъолъыр» зыфиIорэм ар къыдыхэлъытагъ.

Iофтхьабзэм я 3-рэ курсым щеджэрэ студент 12 хэлэжьагъ. ЗекIохэм къагъэнэгъэ хэкIхэр аугъо­игъэх. Шъугу къэдгъэкIыжын ыпэкIи Iофтхьабзэу «Экоход 01» зыфиIорэр зэрэзэхащэгъагъэр. Зэрагъэкъабзэрэм дакIоу цIыфхэм зызыщагъэпсэфырэ гъэIагъэхэр, къэбарлъыгъэIэс стендхэр гъэлэгъэнхэмкIэ адеIа­гъэх. Iофтхьабзэм икIэухым анахь къагъэгъунэрэ чIыопс чIыпIэхэр къэпкIухьэхэ зыхъукIэ шапхъэу узэрыгъо­зэнхэ фаехэр студентхэм къафаIотагъэх, псэушъхьэу мэзым хэсхэм афэгъэхьыгъэ тхылъ цIыкIухэри къафагощыгъэх.

«Адыгеир — псауныгъэм ишъолъыр» зыфиIорэр Адыгэ къэралыгъо университетым истратегическэ проектхэм ащыщ. Программэу «Приоритет» зыфиIорэм ар къыдыхэлъытагъ. Шъолъырым щыпсэурэ цIыфхэм ящыIэкIэ-псэукIэ нахьышIу шIыгъэныр ыкIи ахэр нахь бэгъашIэ хъунхэм фэшI лъэныкъо зэфэшъхьафхэмкIэ Iоф ашIэныр ары пшъэрылъ шъхьаIэу яIэр. Физическэ культурэмкIэ, спортымкIэ, псауныгъэр къэухъумэгъэнымкIэ, психологиемкIэ, социальнэ IофшIэнымкIэ, экологиемкIэ ыкIи зекIонымкIэ Iофтхьабзэхэр зэхащэх.

Адыгэ Республикэм щыпсэухэрэм ящыIэкIэ-псэукIэ нахьышIу шIыгъэнымкIэ ыкIи бэгъашIэ хъунхэмкIэ зыпылъ Iофтхьабзэхэр зэхащэнхэр ары пшъэрылъ шъхьаIэу зэхэщакIохэм зыфагъэуцужьырэр.

Адыгэ къэралыгъо университетым ипресс-къулыкъу.