Гъэзетэу «Адыгэ макъэр» зыщыIэр илъэси 100 зэрэхъугъэм фэгъэхьыгъэ конвертэу Урысыем и Почтэ къыдигъэкIыгъэм илъэтегъэуцо мэфэкI шIыкIэм тетэу непэ Лъэпкъ музеим щыкIуагъ.

Конвертыр дахэу гъэкIэрэ­кIа­гъэ. Апэрэ илъэсхэм арап хьа­­­рыф­­хэм­кIэ къыдэкIыщтыгъэ нэкIуб­гъор, Адыгеир къэралыгъо гъэпсыкIэ иIэу зыщыIэр илъэси 100 зыхъу­гъэ мафэм къыдэкIы­гъэр, апэрэ редакторэу иIэгъэ КIэ­рэ­щэ Тембот ыкIи респуб­ликэм икъэлэ шъхьаIэ исурэт ащ тетых. ЗэкIэмкIи конверт мин 250-рэ къыдагъэкIыгъ, ащ щыщэу республикэм мин 50-р къащагъ.

Тарихъым хэхьэрэ хъугъэ-шIагъэм апэрэу мыхъурыр тыригъэуцонэу фагъэшъошагъ КIэрэщэ Тембот ыкъоу Анцокъо. Уасэ фашIэу ятэ исурэт конвертым зэрэтырагъэу­цуагъэм, нахьыжъхэм ашIагъэр зэра­щымыгъупшэрэмкIэ зэра­фэ­разэр ащ къыIуагъ. ЫпэкIэ гъэ­хъэ­­гъэшIухэр ашIыхэзэ лэ­жьэнхэу гъэзетым иIофышIэ­хэм къафэ­лъэIуагъ. Нэужым АР-м лъэпкъ Iоф­хэмкIэ, IэкIыб къэралхэм ащып­сэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр мыхъурыр тыригъэуцуагъ.

— ЛIэшIэгъум къыдэкIыгъэ гъэзетымкIэ непэрэ Iофтхьабзэм мэхьанэшхо иI. ЫпэкIэ гъэзетым фэгъэхьыгъэ мыщ фэдэ хъугъэ-шIагъэ щыIагъэп. Конвертыр Адыгеим имызакъоу Урысыем щызэлъашIэщт. ЫпэкIэ хэхъо­ныгъэхэр шъушIыхэзэ, гъэзетыр джыри бэрэ къыдэжъугъэкIынэу сыкъышъуфэлъаIо, — къыIуагъ ащ. «Адыгэ макъэм» иредактор шъхьаIэу МэщлIэкъо Саидэ нэужым мыхъурыр тыригъэу­цуагъ ыкIи Iофтхьабзэм къекIолIа­гъэхэм закъыфигъэ­загъ.

— МэфэкI Iофтхьабзэр Адыгэ шъуашэм и Мафэ ехъулIэу зэрэзэхащагъэм мэхьанэшхо иI. Шъуашэр щыгъын закъоу щы­мытэу, ар адыгэ лъэпкъым ынап. «Адыгэ макъэри» джащ фэдэу республикэм ынап. Ащ фэгъэ­хьыгъэ конверт щыIэ зэ­рэ­­хъугъэм тегъэгушхо. Тигъэзет ныдэлъфыбзэм икъэухъумэнкIэ, адыгэ культурэм, шэн-хабзэхэм якъызэтегъэнэжьынкIэ IофшIэ­нышхо егъэцакIэ. Тарихъым хэхьащт конвертым тетыщтым тегупшысагъ ыкIи ащ купкI ин иIэу зэрэдгъэпсыщтым тыпы­лъыгъ.

Илъэс зэкIэлъыкIохэм гъэзе­тым щылэжьэгъэ журналистхэм, шIэныгъэлэжьхэм, политикхэм ыкIи общественнэ IофышIэхэу ащ инэкIубгъохэм якъыдэгъэкIын зиIахьышIу хэзылъхьагъэхэм IофшIэн мыпсынкIэу ашIагъэм итамыгъэу мы конвертыр хъунэу тэгугъэ. Джащ фэдэу мы Iофыгъор непэрэ мафэм «Адыгэ макъэм» щылажьэ­хэрэмкIэ гуIэтыпIэ хъунэу, джыри нахь гухахъо яIофшIэн хагъотэнэу сэлъытэ, — къыIуагъ МэщлIэкъо Саидэ.

Конвертыр къыдэбгъэкIын амал зэрэщыIэмкIэ редакцием къыдэгощагъэу, Мыекъопэ къэлэ хьыкумым ихьыкумышIэу УдыкIэко Эдуард, Урысыем и Почтэ Адыгэ РеспубликэмкIэ и ГъэIорышIапIэ ипащэу Наталья Алифиренкэм, гумани­тар ушэ­тын­хэмкIэ Адыгэ рес­публикэ институтэу Т. КIэра­щэм ыцIэ зыхьырэм ипащэу ЛIыIужъу Адам, АР-м итеатраль­нэ объединение ихудожественнэ пащэу Ацумыжъ Рустам, КъТРК-у «Адыгеим» ипащэу Пхъэш Ащэмэз, ащ иIофышIэ куп, нэмыкIхэми гущыIэ фабэ­хэр къаIуагъэх, мыхъурыр тыра­гъэуцуагъ.

Iоныгъом и 28-м къыще­гъэ­жьагъэу «Адыгэ макъэр» илъэси 100 зэрэхъугъэм фэгъэ­хьыгъэ конвертхэр цIыфхэм зэрагъэ­гъотын алъэкIыщт, ахэр Уры­сыем и Почтэ икъутамэхэм ачIэ­лъыщтых.

ДЕЛЭКЪО Анет.