Адыгэ Республикэм промышленнэ продукциер хэбзэнчъэу зэрагъэзекIорэм пэуцужьыгъэнымкIэ и Комиссие изичэзыу зэхэсыгъо тутынхэр, автомобиль щэрэхъхэр хэбзэгъэуцугъэу щыIэм димыштэу зэрагъэфедэхэрэм, гъэщхэкIхэм тамыгъэхэр зэратырагъэуцохэрэм, Iэзэгъу уцхэр зэрагъэзекIохэрэм гъунэ зэралъафырэм ыкIи нэмыкI Iофыгъохэм щатегущыIагъэх.

Адыгеим и ЛIышъхьэу КъумпIыл Му­рат пшъэрылъ зэрэфишIыгъэм тетэу АР-м иминистрэхэм я Кабинет и Тхьаматэ игуадзэу ЛIыхэсэ Махьмуд зэ­хэ­сы­гъор зэрищагъ.

Ащ хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр,федеральнэ инспектор шъхьаIэу Сергей Дрокиныр, АР-м ипрокуратурэ, хэгъэгу кIоцI IофхэмкIэ и Министерствэ, Роспотребнадзорым АР-мкIэ и ГъэIорышIапIэ япащэхэр, АР-м иминистрэхэм я Кабинет хэтхэр, муниципалитетхэм япащэхэр.

АР-м хэгъэгу кIоцI IофхэмкIэ и Ми­нис­терствэрэ Роспотребнадзорым АР-мкIэ и ГъэIорышIапIэрэ къызэраты­гъэмкIэ, нахьыбэрэ хэбзэнчъэу агъэфе­дэхэрэм тутынхэр ахэхьэх. Амыгъэнэ­фэгъэ чIыпIэхэм тутын щешъон фимыт­хэу федеральнэ хэбзэгъэуцугъэм къы­де­лъы­тэ. Ар зыукъогъэ нэбгырэ заулэмэ мыгъэ административнэ пшъэдэкIыжь арагъэхьыгъ. Хабзэм ымыдэрэ тутынхэмрэ никотин зыхэлъ пкъыгъохэмрэ зыщэгъэ предприни­мательхэм тазыр атыралъхьагъ, ятовар къаIахыгъ. Зигугъу къэтшIыгъэ хэбзэ­укъоныгъэхэм афэдэхэм ягъогупэ пыбзы­кIы­гъэным тегъэпсыхьэгъэ Iофтхьабзэу зэрахьэхэрэр агъэлъэшынэу ведомствэ заулэмэ игъо афалъэгъугъ.

Автомобиль щэрэхъхэр хэбзэнчъэу зэращэхэрэм якъыхэгъэщынкIэ Iофэу ашIагъэм тегущыIагъэх. Роспотреб­надзорым АР-мкIэ и ГъэIорышIапIэ ипащэхэм къызэратыгъэмкIэ, хъызмэт­зехьаным пылъ нэбгырэ 32-рэ ауплъэ­кIугъ. Щэрэхъхэм тамыгъэ атетмэ, амы­гъэп­сэолъэжьынэу щыт щэрэхъхэр джыри агъэфедэхэмэ зэрагъэшIагъ. Илъэсыр къызихьагъэм щегъэжьагъэу хэбзэукъоныгъэхэр зышIыгъэ щакIохэм япчъагъэ нэбгырэ 16 хъущтыгъэмэ, джы нэбгыри 4-м ар нэсыгъ. Унэе пред­приятиехэм япащэхэу хэукъоныгъэ зышIыгъэу къыхагъэщыгъэхэм щыкIа­гъэхэр дагъэзыжьых.

Росздравнадзорым АР-мкIэ и ГъэIо­рышIапIэрэ АР-м псауныгъэр къэухъу­мэгъэнымкIэ и Министерствэрэ Iэзэгъу уцхэм ягъэзекIонкIэ Iофхэм язытет зэхэсыгъом къыщытегущыIагъэх. Мые­къуапэ, Адыгэкъалэ, Шэуджэн, Красно­гвардейскэ районхэм яIэзапIэхэм Iэзэгъу уцхэр зэрагъэзекIорэр игъом тхылъхэм щадамытхэу къыхагъэщыгъ. Админис­тративнэ хэбзэукъоныгъэхэр зэрашIыгъэм ехьылIэгъэ Iофхэр къапаIэтыгъэх. Росздрав­надзорым АР-мкIэ и ГъэIорышIа­пIэрэ АР-м псауныгъэр къэухъумэгъэ­нымкIэ и Министерствэрэ пшъэрылъ афашIыгъ Iэзэгъу уцхэр зэрагъэзекIорэм гъунэ зэрэлъафырэр агъэлъэшынэу.

АР-м мэкъу-мэщымкIэ и Министерствэ ипащэхэм гъэщхэкIхэм тамыгъэхэр зэратырагъэуцорэм гъунэ зэрэлъафырэр къаIотагъ. 2020-рэ илъэсым ыкIэхэм адэжь Урысые Федерацием и Прави­тельствэ иунашъоу къуаехэм, мороженэм, гъэщхэкIхэм тамыгъэхэр атегъэуцо­гъэнхэм яхьылIагъэр къыдагъэкIыгъ. Респуб­ли­кэм гъэщхэкIхэр къыщыдэзы­гъэ­кI­хэрэм азыныкъо нахьыбэмэ ащкIэ ящыкIэгъэ оборудованиер къызэращэ­фыгъэр зэхэсыгъом щыхагъэунэфыкIыгъ. Къэралыгъо информационнэ системэм щатхыгъэ предприятии 7-р гъэщхэкIхэм тамыгъэхэр атегъэуцогъэнхэм тегъэпсы­хьэгъэ Iофым хэлажьэх. А Iофтхьабзэхэм апэIухьэрэ мылъкум щыщ афигъэкъу­жьыгъэным пае сомэ миллион 27-рэ зытефэщт лъэIу тхылъи 5 джыдэдэм зэхагъэуцуагъ. АР-м мэкъу-мэщымкIэ и Министерствэ пшъэрылъ фашIыгъ гъэщхэкIхэм тамыгъэхэр зэратыра­гъэуцорэм иIоф лъигъэкIотэнэу. Щэ про­дук­циер къыдэзыгъэкIырэ предпри­ятие цIыкIухэри гурытхэри ыужкIэ ащ фэдэ Iофтхьабзэхэм къахарагъэу­бытэщтых.

АР-м иминистрэхэм я Кабинет и Тхьаматэ игуадзэ зэхэсыгъом хэлажьэ­хэрэм къяджагъ Комиссием иунашъохэм ягъэцэкIэнкIэ чаныгъэ нахь къызха­гъэфэнэу.

«Зэхэсыгъом къащыхалъхьэгъэ Iофы­гъо­хэр зытегъэпсыхьагъэхэр республи­кэм исхэм ящыIэкIэ-псэукIэ зыкъегъэIэ­тыгъэныр ары. Адыгеим и ЛIышъхьэ ренэу мы Iофми, цIыфхэм ящынэгъончъа­гъэрэ япсауныгъэрэ япхыгъэ Iофыгъохэ­ми ынаIэ атырегъэты. ТызытегущыIэгъэ IофхэмкIэ шъуизэдэлэжьэныгъэ нахь жъугъэпытэнэу сышъолъэIу», — къыIуагъ ЛIыхэсэ Махьмуд. АР-м и ЛIышъхьэ ипресс-къулыкъу