Адыгэ Республикэм и Къэралыгъо филармоние Iоныгъом и 29-м пчыхьэм сыхьатыр 6.30-м АР-м иконцертнэ объединение и Къэралыгъо симфоническэ оркестрэ программэу «Хит-рок Sимфони» къыщитыщт.

Оркестрэм ихудожественнэ пащэр ыкIи идирижер шъхьаIэр СтIашъу Къэп­лъан.

Къэгъэлъэгъоным хэлэжьэщтых Адыгэ Республикэм и Къэралыгъо орэдыIо-къэ­шъокIо ансамблэу «Ислъамыер», эс­траднэ ансамблэу «Ошъутенэр», АР-м изаслуженнэ артисткэу Даутэ Сусанэрэ Дарья Умбинарэ. Къэгъэлъэгъоным къырагъэблэгъагъ «Голос-8» зыфиIорэ шоум текIоныгъэр къыщыдэзыхыгъэ Бэрбэч Аскэр.

«Рок шъуашэм илъэу къэгъэлъэгъоныр дгъэхьазырыгъ. Къэралыгъо симфо­ническэ оркестрэм ипрограммэу «Хит-рок Sим­фо­ни» зыфиIорэр тигупшысэ къыхэкIыгъ. ЗэлъашIэрэ ансамблэу «Ислъамыем» игъу­сэу симфоническэ оркестрэм орэдхэр къыригъэIощт. «Ошъутенэм» иорэдхэр зэхъокIыгъэхэу цIыфхэм зэхядгъэхыщт. АР-м изаслуженнэ артисткэу Даутэ Сусанэрэ Дарья Ум­бинарэ щыIэныгъэм диштэрэ орэд гъэшIэгъонхэр къаIощтых. Шоу «Голос-8» зыфиIорэм текIоныгъэр къыщыдэзыхыгъэ Бэрбэч Аскэр итворчествэ къэзэрэу­гъоигъэхэр нэIуасэ фэхъущтых», — къы­Iуагъ оркестрэм ихудожественнэ пащэу ыкIи идирижер шъхьаIэу СтIашъу Къэплъан.

АР-м иконцертнэ объединение ихудо­жественнэ пащэу Нэхэе Азэмат къызэ­рэтиIуагъэмкIэ, адыгэ культурэмрэ искус­ствэмрэ ябаиныгъэ къэухъумэгъэныр ары пшъэрылъ шъхьаIэу зыфагъэу­цужьырэр.

Ижъырэ зэманхэм къахэкIыгъэ орэд­хэр рок шъуашэм изылъхьагъэхэм, зэзыгъэфагъэхэм, мэкъамэхэм псэ къа­пы­зы­гъэкIагъэхэм, орэдыжъхэр къыднэ­зы­гъэсыжьыгъэхэм осэ ин афэт­шIын фае.

Филармониер щыIэныгъэм ихъугъэ-шIагъэхэм ягупчэ ит, цIыфхэр зэфещэх. ШъошакIэм илъ рок къэIокIэ хьалэмэтым пчыхьашъхьэ цIыфхэр едэIунхэ алъэкIыщт.

ЛЪЭПШЪЫКЪО Фатим.