УФ-м и Президент Адыгеим и ЛIышъхьэ Рэзэныгъэ тхылъ къыфигъэшъошагъ
Адыгэ Республикэм и ЛIышъхьэу КъумпIыл Мурат Урысые Федерацием ипсэолъэшIынрэ ипсэупIэ-коммунальнэ хъызмэтрэ яхэхъоныгъэ иIахь зэрахишIыхьэрэм фэшI Урысые Федерацием и Президент Рэзэныгъэ тхылъ къыфигъэшъошагъ.
КъумпIыл Мурат иIофшIэн осэшхо къызэрэфишIыгъэм, Адыгэ Республикэм исоциальнэ пшъэрылъхэм язэшIохынкIэ федеральнэ гупчэр IэпыIэгъу къызэрафэхъурэм афэшI Владимир Путиным зэрэфэразэр риIуагъ.
Республикэм и ЛIышъхьэ зэрэхигъэунэфыкIыгъэмкIэ, Адыгеим исхэм Адыгэ Республикэм ихэбзэ Iэшъхьэтетхэм Iофэу ашIэрэр янэрылъэгъу, зэхъокIыныгъэшIухэм адырагъаштэ. Шъугу къэтэгъэкIыжьы псэолъэшIынымкIэ Адыгэ Республикэр зэрэлъыкIотагъэр, щагухэмрэ общественнэ чIыпIэхэмрэ язэтегъэпсыхьанкIэ пэрытныгъэ зэриIыгъыр. 2022-рэ илъэсым псэолъэшIынымкIэ сомэ миллиард 35,3-рэ зытефэгъэ IофшIэнхэр республикэм щагъэцэкIагъэх. 2021-рэ илъэсым егъэпшагъэмэ, проценти 141,7-рэ ар мэхъу (УФ-мкIэ проценти 105,2-рэ).