Джыри Iофыгъуабэ къытпыщылъ
Адыгеим и ЛIышъхьэу КъумпIыл Мурат социальнэ хъытыухэм къызэращитыгъэмкIэ, мы илъэсым Адыгеим щаухэсыгъ республикэ программэу «Коммунальнэ инфраструктурэр гъэкIэжьыгъэныр» зыфиIоу 2023 – 2027-рэ илъэсхэм ателъытагъэр.
Федеральнэ гупчэм мылъку IэпыIэгъоу къытитыщтым ишIуагъэкIэ унэ-коммунальнэ хъызмэтым ылъэныкъокIэ зэшIохыгъэн фаеу щыт Iофыгъохэр игъом ыкIи тэрэзэу гъэцэкIэгъэнхэмкIэ а программэм ишIуагъэ къэкIощт.
Программэм игъэцэкIэн рагъэжьагъ. Мы илъэсым ыкIи къыкIэлъыкIощт илъэсхэм псэолъи 3 агъэцэкIэжьынэу рахъухьагъ, ахэм зэхэубытагъэу сомэ миллион 680,89-рэ апэIухьащт. Пстэуми апэу зыфежьагъэхэр Адыгэкъалэ игъэфэбапIэхэр зэтегъэпсыхьэжьыгъэнхэр ары. Мыхэр жъы зэрэхъугъэхэм ыкIи зыгорэ япэсыгъэн зэрэфаем иIофыгъо бэшIагъэ къызыуцугъагъэр. Трубэ километрэ 14,5-м ехъу зэблэхъугъэн фае, гъэфэбэпIэ камерэ 67-рэ ахэм ахэтыщт. IофшIэнхэр чэзыуитIоу зэшIуахынхэу рахъухьагъ.
Къихьащт илъэсым чъэпыогъум псэуалъэм игъэкIэжьын епхыгъэ IофшIэнхэр зэкIэ зэшIуахынхэу агъэнэфагъ. Ахэм сомэ миллион 276-м ехъу апэIухьащт. ФэбэрыкIуапIэхэр загъэцэкIэжьхэкIэ гупчэ котельнитIумэ яигъэкIотыгъэ гъэцэкIэжьын фежьэщтых.
Ащ нэмыкIэу республикэ программэм диштэу къалэу Мыекъуапэ илъэсэу къихьащтым псырыкIопIэ километрэ 27-м ехъу щагъэкIэжьыщт. Ветеранхэм яурами (урамэу Железнодорожнэм къыщыублагъэу Победэм нэс) псыхэщыпIэр щагъэцэкIэжьыщт.
«Республикэм икоммунальнэ инфраструктурэ тапэкIи нахь гъэкIэжьыгъэным ыкIи хэхъоныгъэ егъэшIыгъэным пае федеральнэ программэхэр, лъэпкъ проектхэр, чIыпIэхэм якъэкIуапIэхэр къызфэгъэфедэгъэнхэмкIэ амалэу щыIэр зэкIэ гъэфедэгъэн фае.
ГущыIэм пае, федеральнэ проектэу «Псы къабзэр» зыфиIорэм къыдыхэлъытагъэу 2019 – 2022-рэ илъэсхэм псэолъэ 13 атIупщыщт, мы илъэсым псырыкIопIэ 14-мэ япхыгъэ IофшIэнхэр агъэцакIэх. Джащ фэдэу мы илъэсым инженер ыкIи социальнэ инфраструктурэм ишIын ыуж титыщт, МыекъуапэкIэ микрорайонэу Михайловым щашIыщт псэуалъэхэм апае ахэр агъэфедэщтых.
Джыри зэшIотхын фаеу пшъэрылъыбэ тапэкIэ къэт, арышъ, унэ-коммунальнэ хъызмэтым къыхиубытэрэ псэуалъэхэр зэкIэлъыкIо гъэнэфагъэ иIэу дгъэкIэжьыщтых, коммунальнэ фэIо-фашIэхэр зэрифэшъуашэм тетэу игъом зэшIохыгъэнхэмкIэ тфэлъэкIыщтыр зэкIэ дгъэцэкIэщт», — къыIуагъ КъумпIыл Мурат.
АР-м и ЛIышъхьэ ипресс-къулыкъу