Монополием пэшIуекIогъэнымкIэ федеральнэ къулыкъум и ГъэIорышIапIэу АР-м щыIэм 2023-рэ илъэсым имэзих Iофэу ышIагъэр зыщызэфахьысыжьыгъэ зэхэсыгъо непэ яIагъ.

ГъэIорышIапIэм ипащэу ХьапэкIэ Аслъан пэублэм къызэрэщи­IуагъэмкIэ, хэбзэгъэуцугъэм къыдилъытэрэ лъэныкъо пстэури гъэцэкIэгъэным, рекламэм итын, къэралыгъо ыкIи муниципальнэ фэIо-фашIэхэмкIэ заказхэр, нэмыкIхэр зэшIо­хы­гъэнхэм лъыплъэгъэныр монополием пэшIуекIогъэнымкIэ федеральнэ къулы­къум АР-мкIэ и ГъэIорышIапIэ ипшъэ­рылъ шъхьаIэх. Джащ фэдэу мы феде­ральнэ къулыкъум ес­тественнэ моно­полиехэм Iоф зэрашIэрэми гъунэ лъефы. Ахэм къыдагъэкIырэ товар­хэр, фэIо-фа­шIэу агъэцакIэхэрэр зэкIэми зэфэдэу къызIэкIагъэхьанхэ амал яIэныр ары мы IофшIэныр зытегъэпсыхьа­гъэр.

Мэзихым юридическэ ыкIи физическэ цIыфхэм ятхьаусыхэ ыкIи лъэIу тхылъи 162-рэ къулыкъум къыIэкIэхьагъ. Адми­нис­тративнэ пшъэдэкIыжь ягъэхьыгъэным епхыгъэ унэшъо 68-рэ ышIыгъ. Сомэ миллиони 6-рэ мин 200-м ехъурэ тазырыр къарагъэтыжьыгъ.

Монополием пэшIуекIорэ хэ­бзэгъэу­цугъэр зэрагъэца­кIэ­рэм ылъэныкъокIэ ГъэIорышIапIэм уплъэкIунхэр зэхищэ­гъагъэх, ахэр зэхафыгъэх, ахэм афэгъэ­загъэхэм унашъохэр афагъэхьыгъэх.

Мэзихым дэо тхылъэу къаIэкIэхьагъэхэм электрическэ сетьхэм запа­шIэнымкIэ пIалъэу агъэуцугъэхэр укъуагъэ зэрэхъу­рэм фэгъэхьыгъэу бэ къахэкIыгъэр. Ащ фэшI «Россети Кубань» зыфиIорэ хъыз­мэт­шIапIэм пшъэдэкIыжь зэрихьыщтыр къызщиIорэ унашъохэу 7 аштагъ. ПстэумкIи сомэ миллиони 5 тазыр ащ ытыщт.

Джащ фэдэу рекламэмкIэ монополием пэшIуекIорэ хэбзэгъэуцугъэр зэраукъуа­гъэм фэгъэхьыгъэу тхылъ 11 къаIэкIэ­хьагъ. Ахэм янахьыбэр цIыфым пэшIоры­гъэшъэу зэзэгъыныгъэ дамышIыгъэу рекламэр къызэрэфагъэхьырэр ары зэпхыгъэр. Федеральнэ къулыкъум уасэхэмкIэ ГъэIорышIапIэм зэпхыныгъэ пытэ дыриI. ХъызмэтшIапIэхэм, унэе предприятие инхэм, гъэцэкIэкIо хэ­бзэ ыкIи чIыпIэ зыгъэIоры­шIэжьынымкIэ къулыкъухэм ядэо тхылъхэм язэхэфын Гъэ­IорышIапIэм лъэшэу ынаIэ тырегъэты.

Гъэстыныпхъэ шхъуантIэм, углево­до­роднэ газым ыкIи гъомылап­хъэхэм ащыщхэм ауасэхэр къа­мыIэтынхэм фытегъэпсыхьэгъэ уплъэкIунхэр зэхещэх.

ХЪУТ Нэфсэт.