Аэродромэу «Ханскэм» щынэгъон­чъэу Iоф ышIэным пае республикэм и Опе­ра­тив­нэ штаб шэпхъэ гъэнэфагъэ­хэр Адыгеим щигъэуцугъэх. Километри 5-м къыщымыкIэу аэрод­ромым пэчыжьэнхэ фае мыщ фэдэ Iофтхьабзэхэр зезыхьащтхэр: — пцэжъые ешэщтхэр, шэкIощтхэр, зызгъэпсэфыщтхэр, зызгъэпскIыщтхэр; — сурэт тезыхыщтхэр; — аэродромым къекIокIырэ гъогухэм автомобильхэмкIэ къащызыкIухьащтхэр. Ренэу а чIыпIэм щыпсэурэ цIыфхэу яунэхэм якIолIэжьын фаехэр ыкIи хъызмэт IофшIэныр зэшIозыхыхэрэр ащ къыхиубытэхэрэп. Адыгэ Республикэм и ЛIышъхьэ и Ука­зэу N 120-р зытетэу 2023-рэ илъэсым Iоныгъом и 15-м къыдэкIыгъэм диштэу ащ фэдэ шапхъэхэр агъэуцугъэх ыкIи нэмыкI унашъо къыдэкIыфэ – 2023-рэ илъэсым Iоныгъом и 20-м нэс ахэм кIуачIэ яIэщт. Ахэм адакIоу мы къыкIэлъыкIохэрэр рахъухьагъэх: — автомобиль гъогоу «псэупIэу Род­ни­ковэм екIурэ гъогур» зыфиIорэм зэрэщызекIощтхэм исхемэ зэблэхъу­гъэнэу; — общественнэ транспортыр зэрэзе­кIорэм исхемэ икъоу гъэунэфыгъэнэу; — къагъэгъунэрэ шъолъырым къекIо­кIэу къэбархэр зытетхэгъэщт стендхэр гъэуцугъэнхэу. Щынэгъончъэным ишапхъэхэр укъуа­гъэ мыхъунхэм пае республикэм щып­сэу­хэрэм ыкIи ихьакIэхэм тялъэIу унашъоу аштагъэм къыдилъытэхэрэр агъэцэкIэнхэу.