Тэхъутэмыкъое гурыт еджапIэм имузей ипащэу Хъущт Мирэ Джахьфар ыпхъур кIэщакIо зыфэхъугъэ Iофтхьабзэ бэмышIэу Тэхъутэмыкъуае щыкIуагъ. ХэушъхьафыкIыгъэ дзэ операцием хэлэжьэрэ ХъокIо Тимур мы гурыт еджапIэм чIэсхэм зэIукIэгъу адыриIагъ.

Тимур унэгъо къызэрыкIом къи-хъухьагъ. Ежь нэмыкIэу сабыи 4 яунагъо щапIугъ. Гурыт еджапIэм ия 9-рэ класс къызеух нэуж шофер сэнэхьатыр ыIэ къыригъэхьагъ. Шы спорт комплексэу «Щагъдый» зыфиIорэм щылэжьагъ. Ятэжъ фэдэу кIалэми шыхэр шIу ылъэгъугъэх, ахэм къызэрадекIокIырэм гухахъо хигъуатэщтыгъ. Лъэпкъ мэфэкI мафэхэм шыоу Iофтхьэбзэ зэфэшъхьаф-хэм ахэлэжьэнхэу кIалэхэр рагъэб-лагъэщтыгъэх. Нысэщэ джэгухэм ялъэ-хъани зы щыIэныгъэ гъогу зэдытехьэ-хэрэм яхъяри адаIэтыщтыгъ. Тимур дзэ къулыкъур зыщихьыгъэр имэшIоку гъогухэм япхыгъэ дзэхэр ары.

2022-рэ илъэсым чъэпыогъум и 25-м Тимур хэушъхьафыкIыгъэ дзэ операцием хэлэжьэнэу кIуагъэ. ЫпэрапшIэу зыда-щэгъагъэр Херсон пэблэгъагъ.

Тимур мэкъуогъум зигъэпсэфынэу ядэжь къагъэкIогъагъ. Иунагъуи, иныб-джэгъухэми, игъунэгъухэми ягушIо-гъошхуагъ. Ау уахътэр псынкIэу чъи, хэушъхьафыкIыгъэ дзэ операциер зыщыкIорэ чIыпIэм ыгъэзэжьыгъ. Иподразделение зынэсыжьыгъэм бэ темышIэу гранатэу къатырадзагъэм икъутафэкIэ ыбгъэ кIэлъэныкъо къауIагъ. Дзэ госпиталым ащ къыщеIэзагъэх, ипсауныгъэ зэтыригъэуцожьынэу тхьа-мэфитIу къыратыгъ.

ЗэрэгумэкIырэр къыхэщэу кIалэм янэ къытфеIуатэ: — Хэтрэ ни илъфыгъэ фэгумэкIы. Сэри, сиунагъо исхэри, Iахьылхэри Тимур ышъхьэ къырыкIощтым лъэшэу тегъэгумэкIы. СикIалэ ишэнкIи, итеплъэ-кIи зэхъокIыныгъэхэр зэрэфэхъугъэхэм, щыIэныгъэм уасэ нахь фишIы зэрэхъу-гъэм, иакъыл нахь зэрэзэтеуцуагъэм гу алъыстагъ. Ежь къызхимыгъэщы шIои-гъоми, Тимур сэри, ишъхьэгъуси, ышып-хъуи, ипшъэшъэжъыехэми нахь къыт-тегуIыхьэ зэрэхъугъэр зэхэсшIагъ. Мэфэ 15-р псынкIэу кIуи, зыдэщыIэгъэ чIыпIэм сикIалэ ыгъэзэжьыгъ. ЗэкIэми Тхьэ тыфелъэIу псаоу тадэжь ащ къыгъэзэжьынэу.

— ХэушъхьафыкIыгъэ дзэ операцием хэлажьэхэрэмкIэ ахэм ягупсэхэмрэ яIахьылхэмрэ къазэрафэгумэкIыхэрэм, къызэряжэхэрэм мэхьанэшхо иI. Сэ посылкэу Тимур фэзгъэхьыхэрэм бэ адэсэлъхьэ игъусэ кIалэхэми афикъуным пае, — къытфеIуатэ кIалэм ишъхьэгъусэу Светланэ. – ТимынэIосэ цIыфхэри къыт-фэгумэкIых. Ахэр къытфытеохэшъ, по-сылкэхэм яIэкIэгъэхьанкIэ IэпыIэгъу къытфэхъун зылъэкIыщтхэр зыдэщыIэ чIыпIэхэр, ятелефон номерхэр къытаIо. ЦIыфыгъэрэ гукIэгъурэ зыхэлъхэу къытфэгумэкIхэрэм «тхьашъуегъэпсэу» ясэIо. ЦIыфыгъэр джыри зэрэчIа-мынэжьыгъэр тэ тшъхьэкIэ тыушэтыгъ!

Тэхъутэмыкъое гурыт еджапIэм чIэс-хэр ХъокIо Тимур зыIукIагъэхэр илъэ-сыкIэ еджэгъур зыщырагъэжьэжьыгъэ апэрэ мафэр ары. КIэлэеджакIохэм ащ упчIабэ къыратыгъ. ДзэкIолIхэм япсэукIэ, ящыгъын зыфэдэр, ашхырэр, техникэу къызфагъэфедэрэр ахэм зэрагъашIэ ашIоигъуагъ. Ахэм яупчIэхэм икъоу джэуап дзэкIолIым къаритыжьыгъ.

ЕджэнымкIэ Тимур амалэу иIэр икъоу зэримыгъэфедэщтыгъэр, шIэныгъэ куу иIэным зэрэдэмыгуIапэщтыгъэр, Iэдэбын-чъагъэ гори еджапIэм къыщызхигъэфэн зэрилъэкIыщтыгъэр кIэлэеджакIохэм къафиIотагъ.

— КIэлэегъаджэхэм сызэрямыдэIущ-тыгъэм, десэу къытатыхэрэр загъорэ зэрэсымыгъэцакIэщтыгъэм лъэшэу сырыкIэгъожьы. ПкIэнчъэу уахътэр шъумыгъакIоу шIэныгъэхэр зэжъугъэгъо-тынэу шъосэIо. ХэушъхьафыкIыгъэ дзэ операцием сыхэлажьэ зэхъум сэ къызгурыIожьыгъ бэмэ сиакъыл зэрате-мыфэщтыгъэр, щыIэныгъэм бэ зэрэ-щысIэкIэкIыгъэр.

Непэ, технологиякIэхэр УIэшыгъэ КIуачIэхэм зыщагъэфедэрэ лъэхъаным, шIэныгъэр лъэшэу къышъушъхьапэжьыщт. Мары шъо сотовэ телефонхэр дэгъоу шъогъэIорышIэ. Сэ сыздэщыIэ чIыпIэм ахэр щыбгъэфедэхэ хъущтэп. АщкIэ пыим уздэщыIэ чIыпIэр къышIэн ыкIи лые къыуихын ылъэкIыщт.

ЧIыпIэ къинхэм сызарэфэ нэуж дэгъоу къызгурыIуагъ уидзэ пшъэрылъхэр икъоу бгъэцэкIэнхэм пае лIыгъэ пхэлъын, кIочIэшхо уиIэн зэрэфаер. Анахь шъхьаIэр – уи Хэгъэгурэ уиунагъорэ къызэрэбгъэгъунэхэрэмкIэ шIошъ-хъуныгъэ уиIэныр ары. Джащыгъум текIоныгъэми укъыфэкIощт!

Дзэ частым хэтхэр зэрэзэфэгумэ-кIыжьхэрэм, зым адрэр гум зэрэримы-нэрэм мэхьанэшхо иI. «Узэкъотмэ – улъэш» зэраIоу, пIэ зэкIэдзагъэмэ, бэ ппшъэ дэфэщтыр. Джары дзэкIолIхэр агукIэ нахь зэпэблагъэ зыкIэхъухэрэр.

Гранатэм икъутафэ къыстефи, уIагъэ стелъ хъугъагъэ, ау Тхьэм спсэ къыс-фиухъумагъ. Псаоу сыкъызэрэнэжьыгъэр частым къыздыхэтхэм агъэшIэгъогъагъ.

Мы чIыпIэм тидзэкIолI заулэ щыфэхыгъ. Инэм щыщ синыбджэгъуи ахэм къахэфагъ. Ятэ зэрэфэхыгъэм икъэбар ащ икIалэ къыфэсIотэныр къин дэдэ къысщыхъугъ.

Загъорэ курьерхэм кIэлэцIыкIухэм ясурэтхэмрэ яшIухьафтынхэмрэ къызы-тIэкIагъахьэхэкIэ тэгушIо. Ахэм тыгу къыдащае, кIэлэцIыкIухэмрэ тихэгъэгурэ нахь пхъашэу къэдгъэгъунэ тшIоигъоу тэхъу.

Тэхъутэмыкъое гурыт еджапIэм иму-зей ипащэу Хъущт Мирэ Джахьфар ыпхъуми ыгъэшIэгъуагъ итеплъэкIи, иакъылкIи Тимур зэхъокIыныгъабэ зэрэфэхъугъэр. Ащ иакъыл нахь зэрэ-зэтеуцуагъэр, мэзибгъум пэкIэкIыгъэ къиныгъохэм зэрапсыхьагъэр, щыкIагъэу иIэхэр зэримыушъэфырэр, щыIэныгъэм нэмыкIынэкIэ кIалэр еплъы зэрэхъугъэр, ар зыпIугъэ нымрэ тымрэ зэрафэразэр ипсалъэ къыщыхигъэщыгъ.

ЗэIукIэгъум икIэух дзэкIолIыр кIэлэ-еджакIохэм яушъыигъ якIэлэегъаджэхэм ядэIунхэу, шIэныгъэ куу зэрагъэгъотынэу, цIыфыгъэрэ зэфагъэрэ ренэу ахэлъынэу, Хэгъэгум иухъумэкIо шъыпкъэ хъунхэу.

Тэри Тимур тыфэлъаIо иIофхэр Тхьэм зэпигъэфэнхэу, псаоу ядэжь къы-гъэзэжьынэу.

АКIЭГЪУ Разиет. Тэхъутэмыкъуай.