Культурэм и Унэу Мамхыгъэ дэтым тызэрэIухьэу, пщынэо макъэу ащ къычIэукIырэр зэхэтхыгъ. ТызычIахьэм, пшъэшъэжъыехэри шъэожъыехэри сценэм къыщышъохэу тлъэгъугъэ.

ТыздэкIуагъэр чылэм дэт клуб шъое-цыеу щытыгъэр арэу пшIэжьыщтэп. Ащ ичIэхьагъу, залыр, сценэр, кабинетхэр гуIэтыпIэх ыкIи къабзэх. Мыщ тащыIукIагъ Шэуджэн районым культурэмкIэ и ГъэIорышIапIэ епхыгъэ клуб IофшIэнхэм язэхэщэнкIэ гупчэм ипащэ игуадзэу Юсып Тимур, культурэм и Унэ ипащэу Хьакъунэ Налбый, кружокхэм япащэхэу Iэшъхьэмэфэ СултIан, Хьакурынэ Эльвирэ, пщынаоу Унэрыкъо Аскэрбый, нэмыкIхэми. Я 90-рэ илъэсхэм клубыр зыфэдагъэр агу къагъэкIыжьызэ, непэ гъэхъагъэу ышIыгъэхэм ахэр анэсыгъэх, ар зэрагъэкIэжьыгъэр зэрягуапэр къыхагъэщыгъ.

— Илъэс 15-кIэ узэкIэIэбэжьмэ, мы клубым цIыфхэр къемыкIолIэжьыхэу, теплъаджэ хъугъэу, Iофи ымышIэжьэу, зэхэтэкъуагъэу щытыгъ. Къоджэдэсхэм ар къин къащыхъущтыгъ, зыщы-зэрэугъоинхэ чIыпIэ зэрямыIэм къыхэкIэу культурэм и Гупчэ зычIэт унэу Хьаку-рынэхьаблэ дэтым кIощтыгъэх. Кон-цертхэм, нэмыкI къэгъэлъэгъонхэм къяплъыхэти, къагъэзэжьыщтыгъ, — къытфиIотагъ Тимур.

Хьакъунэ Налбый мыщ ипащэу загъэнэфагъэм къыщегъэжьагъэу чэщи мафи имыIэу лъыплъэзэ, псэуалъэр къызэрэзэтыригъэнагъэр къытаIуагъ. Нэужым лъэпкъ проектэу «Культурэм» къыдыхэлъытагъэу къафатIупщыгъэ ахъщэмкIэ илъэс имыкъукIэ культурэм и Унэу чылэм дэтыр агъэкIэжьыгъ.

АIотэжьыгъ

Клубым Iутхэм дэгъоу Iоф ашIэ. Ащ кружок зэфэшъхьафхэу 8 къыщызэIуахыгъ. ЦIыфхэр къычIэхьэх, кIэлэцIыкIухэм зыщагъасэ. МэфэкIхэр, къэгъэлъэгъон зэфэшъхьафхэр щырагъэкIокIых. Къызэ-рэтаIуагъэмкIэ, мы илъэсым лъэпкъ театрэм иIофышIэхэм мыщ спектаклэхэр къыщагъэлъэгъуагъэх, музыкальнэ теат-рэр къэкIогъагъ. Гъэ къэс игъэкIотыгъэу клубым адыгэ быракъым и Мафэ щыхагъэунэфыкIы, мыгъэ адыгэ шыухэри ащ хагъэлэжьагъэх, культурэм игупчэ шъыпкъэу ар хъугъэ.

Къэшъох, мэуджых

Клубыр къызызэIуахыжьыгъэм къыще-гъэжьагъэу Iэшъхьэмэфэ СултIан икру-жокэу кIэлэцIыкIухэм адыгэ къашъохэр зыщарагъашIэрэм икъэбар шIэхэу райоными, республикэми ащызэлъашIагъ. Апэрэ уахътэм кружокым кIэлэцIыкIуи 100 фэдиз къэкIогъагъ, непи ахэм ащыщ-хэр аныбжьыкIэ куп-купэу зэтеутыгъэхэу егъасэх, лъэпкъ къашъом «ишъэфхэр» арегъашIэ. КъэшъокIо цIыкIухэри, ахэм янэ-ятэхэри фаехэу къызэрэкIохэрэр къытаIуагъ. Зэнэкъокъубэмэ ахэлажьэх, ахэм текIоныгъэхэр къащыдахых. Мары икIыгъэ илъэсым республикэм щыкIогъэ кIэлэцIыкIу фестивалэу «Адыгеим ижъогъожъыехэр» зыфиIорэм апэрэ чIыпIэр къыщахьыгъ, нэмыкI гъэхъа-гъэхэри яIэх. Ахэм яшыхьат клубым ипащэ икабинет щытлъэгъугъэ щытхъу тхылъхэр, дипломхэр, грамотэхэр.

СултIан кIэлэцIыкIумэ шъхьэкIэфагъэ къыфашIы, ыIорэм едэIух, къаригъэ-лъэгъурэр агу раубытэ. Ежьми ыгуи ыпси Iофым, сабыеу ыгъасэхэрэм ахелъхьэ, къэшъокIо цIыкIухэм яIэпэ-Iэсэныгъэ зэрэхигъэхъощтым пылъ.

СултIан илъэс зэфэшъхьафхэм «Нал-мэсым», «Ислъамыем» ахэтыгъ, профес-сиональнэ къэшъуакIу. Чылэм къызегъэ-зэжьым, районымкIэ культурэм и Гупчэ Iоф щишIагъ, Мамхыгъэ клубыр къызы-зэIуахыжьыгъэм къыщегъэжьагъэу ащ ипащэ къыщэжьыгъэу зэдэ-лажьэх.

ЦIыкIузэ апэу культурэм и Унэ къызэращэгъагъэри ыгу къэкIыжьыгъ. Ягъунэгъу кIалэу пхъэкIычыр къэзы-гъэгущыIэщтыгъэм апэу пхъэнтIэкIур ишъонтырыпэу теоу ригъэсагъ.

ЕтIанэ ыIапэ къыубыти клубым къыщагъ, «кIо, къашъо» ыIуи, къэшъокIо цIыкIухэм ахитIупщыхьэгъагъ. А лъэхъаным клубым иIо-фышIэгъэхэ Боджэкъо Зауррэ Сет Долэтхъанрэ ары къэшъо-нымкIэ апэрэ лъэбэкъухэр езыгъэдзыгъагъэхэр. Ахэр щыгъупшэхэрэп ыкIи инэу афэраз.

Кабинетхэм ащыщ кIэлэ-цIыкIухэм сурэт ашIынэу, тхылъыпIэм къэгъагъэхэр хашIыкIынэу, аIэхэмкIэ пкъыгъо цIыкIухэр ашIыхэу зыщагъасэ.

Клубыр чылэм дэсхэми, кIэлэцIыкIухэми ящыкIэгъэ дэдагъ. Ащ къэкIорэ сабыйхэр зэкIэ лъэныкъо зэфэшъхьафхэм афэгъэзагъэх, ерыуаджэу гъогум тетхэп, арышъ, янэ-ятэхэри мэгупсэфых.

Клубым ипащэ Iоф зыдишIэхэрэм афэраз, чылэм культурэр къызэрэ-щиIэтыщтым, икъуаджэ дахэкIэ ыцIэ зэраригъэIощтым пылъ, джары цIыфхэри къызкIыфэразэхэр. Тэри а пстэури къэтлъэгъугъ, кIэлэ-цIыкIухэм къашъоу къытфашIыгъэхэри шIэхэу тщыгъупшэщтхэп.

ШЪАУКЪО Аслъангуащ. Сурэтхэр авторым иех.