Урысыем гандболымкIэ ичемпионат Адыгеим икомандэу хэлажьэрэм мы илъэсым ешIэгъуищэу иIагъэр шIуахьыгъ. Мы мафэхэм зыIукIагъэр Урысыем ичемпионэу «ЦСКА» (Москва).

«АГУ-Адыиф» (Мыекъуапэ) — «ЦСКА» (Москва) — 24:36 (12:17).

Москва икомандэ иешIэкIо анахь лъэшхэм ащыщхэу Екатерина Ильинар, Елена Михайличенкэр ыкIи Сара Ристовска Мыекъуапэ къэкIуагъэхэп. Ау ахэр хэмытхэми, «ЦСКА-р» лъэш дэд. Мы командэм утекIоныр зэрэмыпсынкIэр гандболыр зыгу рихьыхэрэм дэгъоу къагурыIощтыгъ, ар зэIукIэгъум икIэух къыгъэлъэгъуагъ.

Командэхэр къэлапчъэм зэрэдэуагъэхэр зэфэдиз, ау «ЦСКА-м» ыдзыгъэм щыщэу процент 78-р къэлапчъэм дэфагъ, Адыгеим икомандэ — процент 52-рэ. Мыекъуапэ ипшъашъэхэр апэрэ таймым дэгъоу ешIагъэх, Iэгоуи 5 ныIэп хьакIэхэр тапэ зэритыгъэхэр. «АГУ-Адыифым» хэт нэбгыриймэ Iэгуаор къэлапчъэм дадзагъ. Ахэм анахь къахэщыгъэх Алиса Дворцеваяр, Анастасия Селиверстовар, Ирина Бондаренкэр, Виктория Коваленкэр.

ЗэIукIэгъум иешIэкIо анахь дэгъоу бысымхэм къахагъэщыгъэр Елизавета Краснокутскаяр ары. «ЦСКА-м» хэтхэр зэкIэ дэгъоу ешIагъэх, анахьыбэу Iэгуаор къэлапчъэм дэзыдза­гъэр Юлия Козаченко.

— Апэрэ таймыр лъэшэу сыгу рихьыгъ. Тыбанэщтыгъ, ыпэкIэ тилъыщтыгъ. ЯтIонэрэм тIэкIу нахь дэеу тешIагъ. Iоф зыдэтшIэнэу тапэ илъыр ма­кIэп, ау непэ командэм ешIа­кIэу къыгъэлъэгъуагъэм сигъэ­рэзагъ, — къы­Iуагъ «АГУ-Адыифым» итренер шъхьаIэу Наталья Дерипаскэм.

Адыгеим икомандэ Iоныгъом и 22-м «Черноморочкэм», Iоныгъом и 27-м «Лучым», чъэпыогъум и 2-м «Университетым» аIукIэщт. Аужырэ ешIэ­гъур Мыекъуапэ щыкIощт.