ФутболымкIэ Урысыем изэнэкъокъу иятIонэрэ лигэ щешIэрэ командэхэм зичэзыу ешIэгъухэр яIагъэх.

Я 10-рэ турым «Зэкъошныгъэр» Ростов-на-Дону икомандэу «СКА-м» Iу­кIагъ ыкIи текIоныгъэр къыдихыгъ. Шъугу къэдгъэкIыжьын, Урысыем и Кубок къыдэхыгъэнымкIэ зэнэкъокъум мы командэхэр Мыекъуапэ щызэIукIэгъа­гъэх, ащыгъум хьакIэхэм ешIэгъур ахьыгъагъ.

«Зэкъошныгъ» (Мыекъуапэ) – «СКА» (Ростов-на-Дону) — 1:0 (1:0).

Тикомандэ апэрэ чIыпIэм фэбэнэнымкIэ мы текIоныгъэм мэхьанэшхо иIагъ. Я 6-рэ такъикъым Iэгуаор къэлапчъэм дэзыдзагъэр ыпэкIэ щешIэрэ Даниил Антоненкэр ары.

«Кубань Холдингыр» «Динамо Ставрополь» дешIагъ ыкIи 2:0-у текIуагъ. «Биолог-Новокубанск» ыкIи «Севастополь» зыфиIорэ командэхэм язэIукIэгъу 1:1-у аухыгъ. «Зэкъошныгъэр» зэрэте­кIуагъэм ишIуагъэкIэ ятIонэрэ чIыпIэм къэкIуагъ.

Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Кубань Холдинг» — 18. 2. «Зэкъошныгъ» — 16. 3. «Биолог-Новокубанск» — 14. 4. «Рубин» — 14. 5. «Севастополь» — 11. 6. «СКА» — 10. 7. «Динамо Ставрополь» — 3.

КъыкIэлъыкIощт ешIэгъур «Зэкъошныгъэм» Ставрополь щыриIэщт, Iоны­гъом и 23-м чIыпIэ командэу «Динамо» IукIэщт.