ЗэлъашIэрэ усэкIошхоу Расул Гамзатовыр къызыхъугъэр илъэси 100 зэрэхъугъэр Iоныгъом и 8-м Дагъыстан, Москва, нэмыкI субъектхэми ащыхагъэунэфыкIыгъ.

Литературнэ-музыкальнэ пчыхьэзэха­хьэу «И Дагъыстан фэшъыпкъэ къушъхьэ­чIэс» зыфиIорэр Махачкала щыкIуагъ. Художественнэ творчествэмкIэ фестивалэу «Наш Расул» зыфиIорэри щыIагъ.

Махачкала и Урыс драматическэ театрэу М. Горькэм ыцIэ зыхьырэм мэфэкIышхо щызэхащэгъагъ. Дагъыстан и ЛIышъхьэу Сергей Меликовыр къызэхэхьагъэхэм къафэгушIуагъ зэкIэ рес­публикэм мы мэфэкIымкIэ щыкIогъэ Iофтхьабзэхэм онлайн-шIыкIэм тетэу яплъыгъ.

«Ти Расул Гамзатовыр къызытхэмытыжьыр илъэс 20 мэхъу, ау ежь усэкIошхор ишIушIэгъэ мыухыжькIэ къытхэт ыкIи Родинэм къыдеIэ. Иусэхэр мыкIодыжьыщт полкэу, къэрэу фыжьхэр зэгот- зэфэсакъхэу лIэшIэгъухэм ыкIи гъунапкъэхэм ащэбыбых шъыпкъагъэм ыкIи шIум къыфаджэхэу», — къыщиIуагъ игущыIэ шъолъырым и ЛIышъхьэ.

УФ-м и Президент иупчIэжьэгъоу Владимир Толстоир къэралыгъом ипащэу В. В. Путиным ишIуфэс къеджагъ.

Урысыем итхьакIохэм я Союз иIэшъхьэ­тетэу Николай Ивановыр мэфэкIым къы­щыгущыIагъ, Расул Гамзатовым дагъыстан литературэм имызакъоу, урыс литературэр зэриIэтыгъэр, зэригъэбаигъэр кIигъэтхъыгъ.

Р. Гамзатовым иилъэси 100 мэфэкI гъэшIэгъонэу гъэпсыгъагъэ. Ятэу Цадасэ иунэу унагъор зыщыпсэугъэу, Расул ыкIи ышыхэр зыщапIугъэу къуаджэу Цада дэтыр джы Унэ-музей зэгъэзэфагъ, ащ ипчъэхэр мэфэкIым хэлажьэхэрэм афызэIухыгъагъ, ягуапэу цIыфыби щызэб­лэкIыгъ. МэфэкI концертышхом Расул иусэхэр, иорэдхэр къыщаIуагъэх.

УсэкIошхом ыпхъоу Салихат изобразительнэ искусствэхэмкIэ Дагъыстан музеим ипащ, ар зыхэт видеороликым цIыфхэр рагъэплъыгъэх. Ежь тхэкIошхом ихъарзынэщи мы шIыкIэм тетэу къафагъэлъэгъуагъ. Республикэу Дагъыстан итворческэ коллективхэр, къэшъуакIохэр, орэдыIохэр, сурэтышIхэр, композиторхэр, тхакIохэр мэфэкIым хэлэжьагъэх.

Къэралыгъо Думэм идепутатэу Султан Хамзаевым ДагъыстанкIэ Гамзатовым итворчествэ мэхьанэу иIэр мыщ фэдэу кIигъэтхъыгъ: «Объявленный год Расула Гамзатова – это не только про масштабные культурные мероприятия, но и про духовно-нравственное богатство каждого из нас. Еще один повод напомнить себе о творчестве Расула Гамзатова и подумать о том, что имеет непреходящее значение!»

Мамырыкъо Нуриет.