Тиспортсмен текIоныгъэр къыдихыгъ
Мы спорт лъэпкъымкIэ Урысыем ия XI-рэ Кубок икъыдэхын фэгъэхьыгъэ зэнэкъокъухэр Нижегородскэ хэкум икъалэу Бор щыкIуагъэх.
Олимпийскэ чемпионэу, СССР-м спортымкIэ изаслуженнэ мастерэу А.И. Пэфыфым ишIэжь зыщагъэлъэпIэгъэ турнирым зыныбжь илъэс 18-м шIомыкIыгъэхэр хэлэжьагъэх.
Къэралыгъом испортсмен анахь лъэшхэм заушэтыгъ. Ахэм ащыщыгъ Адыгеим щыщ Абдэкъо Зубер. Киллограмм 51-мэ нэс къэзыщэчыхэрэм якуп ар щыбэнагъ. Олимпийскэ резервым испорт еджапIэ итренерхэу Ахмед Гаджимурадовымрэ ЦIэгъошIу Адамрэ агъэсэрэ спортсмен ныбжьыкIэр къин къыщымыхъоу финалым нэсыгъ. Ащ щыIукIагъ Чэчэн Республикэм илIыкIоу Ризван Яхиевым. Адыгеим ибатыр нахь лъэшэу къычIэкIыгъ, зэнэкъокъум апэрэ чIыпIэр къыщыдихыгъ.