Къалэу Шъачэ имэрэу Алексей Копайгородскэм иунашъокIэ администрацием иIофышIэхэм псэупIэхэр къакIухьэхэзэ цIыфхэм егъэблэгъэнхэр афызэхащэх. Къуаджэхэу Тхьагъапшъэ, Хьаджыкъо, ШэхэкIэй ащ фэдэ зэIукIэгъухэр ащашIыгъэх.

— Къэлэ администрацием цIыфхэм зэпхыныгъэ адыриIэным пае шIыкIэ зэфэшъхьафхэр егъэфедэх. ГущыIэм пае, специалистхэр нэбгырэ пэпчъ шъхьа­фэу IокIэ, псэупIэхэм зэхахьэхэр ащашIых, интернет-приемнэм Iоф ешIэ, социальнэ хъытыур агъэфедэн алъэ­кIыщт. Джыри мары гупчэм пэIудзыгъэ къуа­джэхэм адэсхэм гумэкIыгъоу, упчIэу яIэхэр специалистхэм игъом афагъэзэн, джэуап агъотын амал яIэным фэшI къалэм ипащэ иунашъокIэ ащ иIофшIэгъухэм псэупIэхэр къакIухьанхэу рагъэ­жьагъ, — къыIуагъ Шъэчэ администрацием и ГъэIорышIапIэу цIыфхэм ыкIи организациехэм Iоф адэзышIэрэм ипащэу Елена Калининам.

Администрацием къызэрэщаIуагъэмкIэ, «мобильнэ приемнэр» псэупIэм къызщыкIощт уахътэм пэшIорыгъэшъэу зыщагъэгъозэнэу цIыфхэм амал яI, отделхэм ыкIи гъэIорышIапIэхэм зэкIэми ялIыкIохэр IофшIэкIо купым хэтых. Социальнэ псэуалъэхэм ягъэцэкIэжьын, пыдзафэу къырахыхэрэр зэралъхьащт контейнерхэр зэрэщымыIэхэр, псыхъо нэпкъхэм ягъэпытэн, псыр, электричествэр икъоу къызэраIэкIэмыхьэрэр, гъогухэм язытет, «догазификацием» фэгъэхьыгъэ программэм зэрэхэлэжьэщтхэр, кIэлэегъаджэхэм социальнэ псэупIэхэр ятыгъэнхэр ары анахьэу зыIукIагъэхэр зыгъэгумэкIыхэрэр. Ежь ышъхьэкIэ, иунагъокIэ гумэкIыгъоу иIэр къезыхьылIагъэхэри къахэкIыгъэх.

Администрацием къызэрэщаIуагъэмкIэ, нахьыбэр джа чIыпIэм щызэхэфыгъэ мэхъу, къанэрэр ахэм афэгъэзэгъэ къулыкъухэм Iоф адашIэным фэшI аIэкIагъахьэх.

— Къалэм, район гупчэм апэIудзыгъэ псэупIэхэм адэсхэмкIэ, анахьэу нэжъ- IужъхэмкIэ, ягумэкIыгъохэм къядэIунхэм, къызэхахынхэм мэхьанэшхо иI, — къы­Iуагъ къуаджэу Хьаджыкъо ичIыпIэ общественнэ зыгъэIорышIэжьыпIэ итхьаматэу Шъыжъ Мусэ. — Къуаджэм Iофыбэ дэлъ, арышъ, сыд фэдэрэ IэпыIэгъуи нэбгырэ ыкIи унагъо пэпчъ ищыIэныгъэ зэхъокIыныгъэ фишIын ылъэкIыщт. Мыщ фэдэу цIыфхэм ягумэкIыгъохэм къалэм ипащэхэм анаIэ къы­зэрэтырадзагъэр уимыгопэн ылъэкIыщтэп.

Графикым къызэрэщыдэлъытагъэмкIэ, «мобильнэ приемнэр» джы Къэлэжъ зыдэщыIэщтыр.

НЫБЭ Анзор. Сурэтыр: ПсышIопэ район администрацием ихъарзынэщ.