Сэкъатныгъэ зиIэ кIэлэцIыкIухэр зыпIухэрэм мазэ къэс къаратырэ зыгъэпсэфыгъо мафэхэр джы зэхэубытагъэу илъэсым къыкIоцI агъэфедэнхэ алъэкIыщт ыкIи ялэжьапкIэ къаратызэ мэфэ 24-м къыкIоцI загъэпсэфыщт.

[caption id="attachment_138746" align="aligncenter" width="800"] Сурэтыр: ЗэIухыгъэ къэбарлъыгъэIэс амалхэр.[/caption]

Ащ фэгъэхьыгъэ хэбзэгъэуцугъэм фашIыгъэ зэхъокIыныгъэм УФ-м и Президент кIэтхагъ ыкIи 2023-рэ илъэсым Iоныгъом и 1-м къыщегъэжьагъэу кIуачIэ иIэ хъугъэ.

АР-м псауныгъэр къэухъумэгъэнымкIэ и Министерствэ къы­зэритыгъэмкIэ, 2023-рэ илъэсым ищылэ мазэ и 1-м ехъулIэу сэкъатныгъэ зиIэ кIэлэцIыкIу 1576-рэ фэдиз республикэм щатхыгъ, ахэм ащыщэу нэбгырэ 938-р — шъэожъыех, 638-р —пшъэшъэжъыех. Мыщ фэдэ купым хэхьэрэ кIэлэцIыкIухэм IэзэпIэ-зыгъэпсэфыпIэхэм къащяIэзэнхэ фитыныгъэ яI. Гъэнэфагъэ ахэр язакъоу, ны-тыхэм, яIэхьылхэм яIэпыIэгъу хэмытэу, а чIыпIэхэм кIонхэ зэрамылъэ­кIыщтыр. Ащ пае сэкъатныгъэ зиIэ кIэлэцIыкIухэр зыпIухэрэм яфэшъуашэу къалэжьыгъэ зыгъэпсэфыгъор атырагъэкIуадэщтыгъ. Джы а Iофыгъор дэгъэзыжьыгъэ хъугъэ.

Зигугъу къэтшIырэ хэбзэ­гъэуцугъэм зэхъокIыныгъэу фэхъугъэм епхыгъэу АР-м Iоф­шIэнымкIэ ыкIи социальнэ хэхъоныгъэмкIэ и Министерствэ IофшIэн зэфыщытыкIэхэмкIэ, IофшIэныр щынэгъончъэнымкIэ ыкIи социальнэ партнерствэмкIэ иотдел иIофышIэу Дзыбэ Заремэ гущыIэгъу тыфэхъугъ.

— ЫпкIэ аратызэ зыгъэ­псэфыгъо тедзэхэр зыгъэфедэнхэ зылъэ­кIыщтхэр сэкъатныгъэ зи­Iэ кIэлэ­цIыкIу­хэм янэ-ятэ­хэр, алъыплъэнэу аIы­зыхыгъэхэр ары. IофышIэм илъэIу тхылъкIэ IофшIэн язы­гъэ­гъо­тырэм а ма­фэ­хэр къаретых. Зе­кIорэ шап­хъэхэм­кIэ сэкъатныгъэ зиIэ сабыим зэ­рэ­лъыплъэрэм пае мазэм къыкIоцI зыгъэпсэфыгъо мэфи 4 Iоф зы­шIэрэ ны-тыхэм язырэм къаIихын фит. ЫпэкIэ а мафэхэр мазэм къыкIоцI бгъэфе­дэнхэу щытыгъ, зымыгъэфедэхэкIэ, пшIокIодыщтыгъэх. Джы 2023-рэ илъэсым Iоныгъом и 1-м къыщегъэжьагъэу къатефэрэ зыгъэпсэфыгъо мафэхэр зэ­Iуа­гъэкIэнхэшъ, зэгъэфедэгъу (мэфэ 24-р) ашIын амал щыIэ хъугъэ, — хигъэунэфыкIыгъ Дзыбэ Заремэ.

Зыгъэпсэфыгъо тедзэ пэпчъ ным е тым гурытымкIэ илэжьапкIэ фэдиз къыфалъытэщт. А мафэхэр зыщыбгъэфедэщтхэ уахътэр гъэнэфэгъэным пае Iоф­шIэн языгъэгъотырэм пэшIорыгъэшъэу зэзэгъыныгъэ дэп­шIын фае.

Iэшъынэ Сусан.