Мыекъуапэ игурыт еджапIэу N15-м ия 6-рэ класс щеджэрэ Алек­сандр Лапшовым къэмлэни 5-мэ адэфэрэ IэшIу-IушIу зэфэ­шъхьафхэр хэушъхьафыкIыгъэ дзэ операцием щыIэ тидзэкIолIхэм афаригъэщагъ.

Iоныгъом и 4-м Александр къызыхъугъэ мафэр хигъэунэфыкIыгъ, ащ ыныбжь илъэс 12 хъугъэ. ИмэфэкIкIэ шIухьафтынэу къыратыгъэ ахъщэмкIэ IэшIу-IушIухэр къыщэфынхэшъ, хэушъхьафыкIыгъэ дзэ операцием хэлажьэхэрэм афаригъэ­щэнэу рихъухьагъ.

— А гухэлъыр зыздэсIыгъыр тIэкIу шIагъэ, си­мэфэкI къэсыфэ сежагъ, — къеIуатэ шъэожъы­ем. — Зыми сыригъэзыгъэу щытэп, сянэ-сятэ­хэми къыса­Iуагъэп. ХэушъхьафыкIыгъэ дзэ операциер къызежьагъэм къыщыублагъэу къэбархэм сядэIу, къэтын зэфэшъхьафхэм сяплъы.

Ахэм ащыщ горэм хэслъэгъуагъ пшъэшъэжъые горэм IэшIу-IушIу­хэр дзэкIолIхэм афитIупщыгъэу, нэмыкI ныбжьыкIэхэми гъомылэпхъэ зэфэшъхьафхэр афарагъа­щэхэу, письмэхэр атхыхэу. Сэри къин зылъэгъоу тимамырныгъэ къэзыухъумэхэрэм, мыбэми, си­шIуагъэ язгъэкIынэу исхъухьагъ.

Александр янэу Светлана Лапшовам республикэ гъэзетэу «Советская Адыгея» зыфиIорэм Iоф щешIэ. ИкIалэ шIушIэ лъэбэ­къоу ышIыгъэр лъэшэу ыгъэшIэгъуагъ ыкIи ыгъэгушIагъ. — Шъыпкъэр пIощтмэ, зэрэ­унагъоу дгъэшIэгъуагъэ, — къеIуа­тэ Светланэ. — Илъэс къэс къызыхъугъэ мафэм ехъулIэу къыратырэ ахъщэмкIэ джэголъэ зэфэшъхьафхэр къыщэфыхэу хэбзагъэ. Мыгъэ теупчIыгъ: «Саша, сыда анахьэу узыфаер? ИщыкIагъэмэ, уиахъщэ къыпфыхэдгъэхъощт». «Зыми сыфаеп, кушъхьэфачъи, самокати, телефони зэкIэри сиIэх. Сызыфаер шIухьафтынэу къысатыгъэ ахъщэмкIэ IэшIу-IушIухэр дзэ­къулыкъушIэхэм афязгъэщэнэу ары» къытиIуагъ. Макаронхэр, щаир, тхьацухэкI зэфэшъхьафхэр къэтщэфыхэмэ нахьышIоу сэ слъытагъэ шъхьаем, сикIалэ къыздыригъэштагъэп. «IэшIу- IушIухэр зашхыхэкIэ агу нахь къыдищэещт» ыIуагъ. Александр ащ фэдэ унашъо ышIыным ушъхьа­гъоу фэхъугъэхэм ащыщ сшэу Игорь жъоныгъокIэ мазэм зэзэгъыныгъэм кIатхи, къулыкъу ыхьынэу хэушъхьафыкIыгъэ дзэ операцием зэрэкIуагъэр. Ащ фэгъэхьыгъэ къэбархэр тиунагъо зэпымыоу къызэрэщекIокIыхэрэм къапкъырыкIыгъэу къысшIошIы.

Мы кIэлэ губзыгъэм ащ фэдэ шIушIэн нэшанэр къызэрэха­фэрэр апэрэп. 2015-рэ илъэсым Украинэм икъыблэ-къохьапIэ егъэзыгъэкIэ зышъхьэ къизыхы­жьынэу хъугъэгъэ унагъохэм кIэлэцIыкIухэр бэу ахэтыгъэх. Ахэм апае шIушIэ Iофтхьабзэ янэ зыIут редакцием зызэхещэм Александр илъэситф ныIэп ыныбжьыгъэр. Ащ дэжьым иджэгуалъэхэм азыныкъо ыугъойи кIэ­лэцIыкIухэм афищэгъагъ.

Украинэм щыкIорэ хэшъхьафыкIыгъэ дзэ операцием хэлэжьэрэ дзэкъулыкъушIэхэм апае шIушIэ IэпыIэгъоу Адыгеим икIырэр зэпыурэп. Ахэр IофшIэпIэ чIыпIэ зэфэшъхьафхэм аща­угъоих.

Александр Лапшовым ыгъэхьазырыгъэ шIушIэ IэпыIэгъур ыкIи гущыIэ фабэхэр зэрытхэгъэ письмэр Адыгеим икъэзэкъ ныбжьыкIэмэ я Союз Iоныгъом и 8-м афыIуищагъ.

Ащ итхьаматэу Екатерина Загорулько къызэриIуагъэмкIэ, тхьамэфитIу-щы тешIэ къэс аугъоирэ шIушIэ IэпыIэгъур зэкIэ тидзэкIолIхэр зыдэщыIэ чIыпIэм нагъэсых.

— Тигуапэ непэ тилIыхъужъхэм зэрахьэрэ Iоф къиныр ныбжь зиIэхэми, анахьэу ныбжьыкIэхэми, къагурыIозэ хэти фэлъэкIыщтымкIэ IэпыIэгъу зэрафэхъурэр. КIэлэеджакIохэм зэпымыоу сурэтшIыгъэхэр, джэ­гуалъэхэр, письмэхэр афатIупщых. Ау непэ Александр къыгъэ­хьазырыгъэ къэмланхэм афэдиз зы нэбгырэм къытищэлIагъэу къыхэкIыгъэп. МэфитIукIэ узэкIэ­Iэбэжьымэ тыкъэкIожьыгъэ къо­дый, тидзэкIолIхэм бжыхьэм ящыкIэгъэщтэу къаIуагъэхэр джы зытыугъойхэкIэ, Александр ишIушIэ IэпыIэгъуи ахэтэу афэтщэщтых. Ежь иахъщэкIэ къызэрищэфыгъэри къафэтIотэщт, — хигъэунэфыкIыгъ Екатерина Загорулько.

Илъэс 12 нахь зымыныбжь Александр Лапшовым изекIуакIэ урымыгушхон плъэкIырэп. Ащ фэдэ цIыфхэр тикъэралыгъо еIэфэхэ, инеущырэ мафэ зэрэпытэщтым тицыхьэ телъ.

Iэшъынэ Сусан.