Хэдзынхэр макIох
Iоныгъом и 8-м къыщыублагъэу и 10-м нэс Мыекъуапэрэ Каменномостскэмрэ ялIыкIо къулыкъухэм ядепутатхэр хадзыщтых, джащ фэдэу Мыекъопэ районым идепутат ихэдзын тедзэхэри кIощтых.
[caption id="attachment_138723" align="aligncenter" width="800"] Сурэтыр: А. Балабась.[/caption]
Iоныгъо мазэм и 10-м мэкъэтыным имэфэ ЗыкI зэхащэщт. Ащ къыдыхэлъытагъэу Мыекъуапэ ыкIи Мыекъопэ районым янароднэ депутатхэм яхэдзынхэр ащыкIощтых, нэбгырэ 21-р партийнэ спискэмкIэ, 9-р зы мандат зиIэ округхэмкIэ хадзыщтых.
Хэдзынхэр зыщыкIорэ участкэ 72-рэ Адыгеим къыщызэIуахыгъ. Мэкъэтыныр хэдзын округи 9-мэ ащэкIо.
ПстэумкIи хадзын фаер нэбгырэ 46-рэ, кандидатэу хэдзынхэм ахэлэжьэщтхэр нэбгырэ 203-рэ мэхъу. Ахэм ащыщэу 155-мэ зыкI хэдзыпIэ округхэмкIэ, 45-мэ зы мандат зиIэ округхэмкIэ зыкъагъэлъэгъуагъ.
Участковэ хэдзыпIэ комиссиехэм яIофшIэн пэшIорыгъэшъэу аублагъ. Хэдзынхэр зыщыкIощтхэм зэкIэми видеокамерэхэр ачIэтых. Бюллетеньхэр зыщаратыгъэхэм къыщыублагъэу ахэм зэпымыоу алъэплъэх ыкIи къагъэгъунэх. ХэдзыпIэ участкэхэр полицием икъулыкъушIэхэм пэшIорыгъэшъэу ауплъэкIугъэх. Хэдзынхэр зыщыкIощтхэ мафэм участкэхэм ачIахьэхэрэр пкъыгъо гъэнэфагъэхэр агъэфедэхэзэ ауплъэкIух, щынэгъончъэным къулыкъушIэхэр лъэплъэх.
Iоныгъом и 1-м къыщегъэжьагъэу и 4-м нэс шъолъырыкIэхэм къарыкIыгъэхэу тиреспубликэ щыпсэухэрэм Адыгеим амакъэ щатын амал яIагъ. Iоныгъом иапэрэ мафэхэм ахэм апае зипIалъэ къэмысыгъэ мэкъэтыныр зэхащагъ. Донецкэ ыкIи Луганскэ Народнэ республикэхэм, Запорожскэ ыкIи Херсон хэкухэм яхэбзэихъухьэ къулыкъухэм яхэдзынхэр щыIэщтых. Ащ пае къалэу Мыекъуапэрэ псэупIэу Яблоновскэмрэ хэдзыпIэ чIыпIитIу щагъэнэфэгъагъ.
ШъолъырыкIэхэм къарыкIыгъэхэу непэ Адыгеим исхэм яфитыныгъэхэр къызфагъэфедэнхэ алъэкIыгъ. Донецкэ Народнэ Республикэм, Луганскэ Народнэ Республикэм, Херсон ыкIи Запорожскэ хэкухэм япарламентхэм янароднэ депутатхэм яхэдзын хэлэжьэнхэ алъэкIыгъ.