Гриппым пэуцужьырэ вакцинэм ихэлъхьан Iоныгъом и 1-м республикэм щырагъэжьагъ. Ар илъэс къэс зэрэ Урысыеу щэкIо.

АР-м псауныгъэр къэухъумэгъэнымкIэ и Министерствэ къызэритыгъэмкIэ, гриппым ивирус зэпымыоу зызэблехъу, арышъ, эпидемием зызыщиушъомбгъурэ лъэхъаныр къемыжьэзэ вакцинэм изэхэлъыкIи хэплъэжьых, хэгъэхъохэр фашIых.

Гриппыр — псынкIэу зэпахырэ ыкIи зызыушъомбгъурэ узхэм ащыщ. ГухэкI нахь мышIэми, бэхэм мыр уз къызэрыкIоу алъытэ. Ау нэмыкI пэтхъу-Iутхъу узхэм зябгъапшэкIэ, къинэу цIыфым ар зэрэпэкIэкIырэм дакIоу, уз хьылъэхэр хэзыхыхэрэри, зидунай зыхъо­жьыхэрэри щыIэх.

Зигугъу тшIырэ зэпахырэ узыр жъугъэу къызежьэрэр бжыхьэ кIасэр ыкIи кIымэфэ лъэхъаныр ары. Эпидемиер къемыжьэзэ прививкэр зыхябгъэлъхьаным мэхьанэ иI. ТхьамэфитIу зытешIэкIэ пкъышъолым икъэухъумэн ащ регъажьэ ыкIи илъэс псаум екъу.

ШэкIогъум и 1-м нэс вакцинациер кIощт. ШIоигъоныгъэ зиIэ пстэуми гриппым пэуцужьырэ вакцинэр зыхарагъэлъхьанэу медицинэм иIофышIэхэр къэджэх.

Адыгэ Республикэм псауныгъэр къэухъумэгъэнымкIэ и Министерствэ иштат хэмыт врач-эпидемиолог шъхьаIэу Шъэожъ Альбинэ къызэриIуагъэмкIэ, респуб­ликэм пстэумкIи гриппым пэуцужьырэ вакцинэ зэхэлъхьэгъу (дозэ) 102700-рэ къыIэкIэ­хьагъ.

— Вакцинацием пае агъэфедэхэрэр Урысыем къы­щашIыгъэ препаратхэу «Совигрипп» (валентни III-у зэхэт) ыкIи «Ультрикс квадри»(валентни IV-у зэхэт) зыфиIохэрэр ары. «Ультрикс квадри» зыфиIорэр ныбжь зиIэхэм апае хэлъхьагъу 8160-рэ ыкIи кIэлэцIыкIухэм апае хэлъхьагъу мин 20-м ехъу къытIэкIэ­хьагъ. Адрэхэр зэкIэ «Совигрипп» зыфиIорэм фэдэх. Пэтхъу-Iутхъур ыкIи гриппыр къыомыутэкIынхэмкIэ вакцинэхэм яшIогъэшхо къэкIо. Узым зиушъомбгъуныр римыгъажьэзэ, вакцинэр зыхябгъэлъхьанымкIэ мы уахътэр амалышIоу щыт. Вакцинэм цIыфым ииммунитет ыгъэпытэщт, ащ ишIуагъэ къэмыкIощтмэ, зыпари зэрар къыхьыщтэп. ЕгъэзыгъэкIэ вакцинэр зыми халъхьащтэп, ау къагурыIоу нахьыбэмэ ахатлъхьэмэ бэкIэ нахь дэгъу. Арышъ, кIэлэцIыкIухэр, сымэджэнхэм ищынагъо нахь зышъхьарыт купым къыхиубытэхэрэри къызэрэтыухъумэщтхэм тежъугъэгупшыс! — хигъэунэфыкIыгъ Шъэожъ Альбинэ.

Прививкэ зышIын гухэлъ зиIэхэр зыщыпсэухэрэ чIыпIэм епхыгъэ поликлиникэхэм якIолIэнхэ фае. Гъэсэныгъэм иучреждениехэм ащеджэрэ сабыйхэм вакцинэр ахэзылъхьэрэр кIэлэцIыкIу поликлиникэхэм яIофышIэхэр ары. Джащ фэдэу къоджэ псэупIэхэм ащыпсэухэрэр район гупчэ сымэджэщхэм е фельдшер-мамыку IэзапIэхэм зафагъэзэн алъэкIыщт.

Iэшъынэ Сусан.