Муниципальнэ образованиеу «Джэджэ районым» иадминистрацие ипащэщтыгъэм фэгъэхьыгъэ уголовнэ IофымкIэ унашъоу аштагъэм кIуачIэ иIэ хъугъэ.

Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм иIофышIэхэм зэрагъэунэфыгъэмкIэ, муниципальнэ образованиеу «Джэджэ районым» ипащэщтыгъэу А. В. Бутусовым Адыгэ Республикэм и Джэджэ район имэкъумэщ чIыгухэм коммунальнэ пыдзафэхэр 2019-рэ илъэсым щычIаригъэтIэгъагъэх. Ащ нэужым химическэ веществохэм аушIоигъэ чIыгу Iахьыр, зэрэмыхъущтыр ышIэзэ, а районым щыпсэурэ бзылъфыгъэ горэм бэджэндэу ритыгъ. Хабзэр ыукъозэ IэнэтIэзехьэм зэрар къэзыхьырэ веществохэмкIэ чIыгур зэриушIоигъэм дакIоу цIыфхэми, ежь районми иягъэ аригъэкIыгъ, экологиери ыушIоигъ.

Урысые Федерацием и Следственнэ комитет и Следственнэ гъэIорышIапIэу Адыгэ Республикэм щыIэм къыIэ-кIэхьэгъэ материалхэм ялъытыгъэу я 247-рэ статьям иа 1-рэ Iахь (тыкъэ-зыуцухьэрэ дунаим зэрар къыфэзыхьын зылъэкIыщт вещество ыкIи пыдзэфэ щынагъохэм уадэзекIон зэрэфаер) къыдилъытэхэрэр зыукъогъэ илъэс 52-рэ зыныбжь хъулъфыгъэу районым ипащэу щытыгъэм епхыгъэ Iофыр зэхэфыгъэ хъугъэ.

Джэджэ районым ихьыкум А. В. Бутусовыр Урысыем и Уголовнэ кодекс ия 247-рэ статья иа 1-рэ Iахь, ия 286-рэ статья ия 2-рэ Iахь къызэрэдалъытэрэм тетэу ыгъэмысагъ, тазырэу сомэ мини 100 тыралъхьагъ. Ащ нэмыкIэу къэралыгъом ифедэу сомэ мин 580-рэ, АР-м ипрокуратурэ зэригъэнэфагъэм тетэу, ытынэу ыпшъэ ралъхьагъ. Пщыныжьэу ыхьыщтым хэбзэ кIуачIэ иIэ хъугъэ.

Урысыем и ФСБ и ГъэIорышIапIэу Адыгэ Республикэм щыIэм ипресс-къулыкъу