«АГУ-Адыиф» — «Астраханочка» 24:32 (12:18). ГандболымкIэ Урысыем ичемпионат къыдыхэлъытэгъэ апэрэ ешIэгъур Адыгеим икомандэ иIагъ, ар Мыекъуапэ щыкIуагъ.

Зэнэкъокъум изыфэгъэхьазырынкIэ «АГУ-Адыифым» гумэкIыгъохэр иIагъэх нахь мышIэми, узыгъэрэзэн ешIакIэ мы мафэм къыгъэлъэгъуагъ. Шъугу къэдгъэ­кIыжьын, мы илъэсым командэм ипащэхэр ыкIи итренерхэр зэб­лахъугъэх.

ХьакIэхэр Iэгоуи 10-кIэ апэ итхэу уахътэ къыхэкIыгъ, ау типшъашъэхэм агу агъэкIодыгъэп, ыпэкIэ илъыщтыгъэх, цIыфэу къэ­зэрэугъоигъэхэр зэрагъэгушIощтхэм пылъыгъэх. ЗэхэщакIохэми алъэкI къагъэнагъэп, «АГУ-Адыифым» июбилейнэ илъэс ихэгъэ­унэфыкIын къыдыхэлъытагъэу хьакIэу къекIолIагъэхэм пхъэ­шъхьэ-мышъхьэхэр апагъохыгъэх. Тикомандэ къытекIуагъэх нахь мышIэми, ащ ешIакIэу къыгъэлъэ­гъуагъэм гандболыр зыгу рихьы­хэрэр ыгъэрэзагъэх.

— Непэрэ зэIукIэгъум текIоныгъэр къыщыдэтхын тлъэкIыгъэп. Ау тиешIакIэ хэдгъахъозэ ыпэкIэ тызэрэлъыкIотэщтым сицыхьэ телъ, — къыIуагъ «АГУ-Адыифым» итренер шъхьаIэу Наталия Дерепаско.

Мы зэIукIэгъум дэгъу дэдэу зыкъыщигъэлъэгъуагъ тикомандэ хэт Алиса Дворцеваям, ащ гъогогъуи 9 Iэгуаор къэлапчъэм дидзагъ. Джащ фэдэу типшъа­шъэхэм къахэщыгъ ыкIи ешIэкIо анахь дэгъоу къыхахыгъ Людмила Баскаковар.

«АГУ-Адыифым» къыкIэлъы­кIощт зэIукIэгъур Iоныгъом и 10-м Ростов-на-Дону щыриIэщт. Суперлигэм икомандэ анахь лъэшхэм ащыщэу «Ростов-Доным» де­шIэщт.