Къэралыгъо тын лъапIэу медалэу «За отвагу» зыфиIорэр хэушъхьафыкIыгъэ дзэ операцием хэлэжьэгъэ младшэ сержантэу Александр Юнниковым ритыжьыгъ Мыекъопэ къэлэ администрацием ипащэу Геннадий Митрофа­новым. Ащ фэгъэхьыгъэ Iофтхьабзэм хэлэжьагъэх къэлэ администрацием иIофышIэхэр, дзэкъулыкъушIэхэр, дзэкIолIым иIахьыл гупсэхэр.

[caption id="attachment_138621" align="aligncenter" width="800"] Сурэтыр: Е. Сергеев[/caption]

Мыекъопэ къэлэ дзэ комиссариатым ипащэ иIэнатIэ пIэлъэ гъэнэфагъэкIэ зыгъэцэкIэрэ Сергей Чумаковым къызэриIуагъэмкIэ, хэушъхьафыкIыгъэ дзэ операцием хэлэжьэрэ тидзэкIолIхэм зэрифэшъуашэу япшъэрылъ лъапIэ агъэ­цакIэ, ящыIэныгъэ емыблэжьхэу неонацизмэм пэуцужьых. Хэгъэгум ыпашъхьэ гущыIэ пытэу щатыгъэр къагъэшъыпкъэ­жьынымкIэ лIыхъужъныгъэ зэрэзэра­хьэрэр, патриот шъыпкъэу зэрэщытхэм тызэрэрыгушхорэр, къыткIэхъухьэрэ ныбжьыкIэхэмкIэ ахэр щысэтехыпIэу зэрэщытхэр ащ къыхигъэщыгъ.

УФ-м и Президент иунашъокIэ медалэу «За отвагу» зыфиIорэр младшэ сержантэу Александр Юнниковым ритыжьызэ, Геннадий Митрофановым къыIуагъ:

— Мыекъуапэ идзэ тарихъ хэпчын умылъэкIынэу Урысыем иблэкIыгъэ ыкIи инепэрэ мафэ епхыгъ. Тятэжъ пIашъэхэм афэдэу тидзэкIолIхэм щытхъу хэлъэу Хэгъэгур къаухъумэ. Мамырныгъэ щыIакIэ цIыфхэм яIэным фэшI апсэ емыблэжьхэу ядзэ пшъэрылъхэр агъэцакIэх. ТекIоныгъэр къагъэблэгъэным лIыгъэу, пытагъэу, кIуачIэу халъхьэрэм лъэшэу тырэ­гушхо. Непэ мы тын лъапIэр сигуапэу Александр есэтыжьы.

Александр Юнниковыр 1992-рэ илъэ­сым къэхъугъ, гурыт-хэушъхьафыкIыгъэ гъэсэныгъэ зэригъэгъотыгъ, унагъо ышIагъ, кIэлэцIыкIуитIу иI. Адыгеим иобщественнэ-патриотическэ щыIакIэ чанэу хэлажьэхэрэм ащыщ. Илъэс 15 ыныбжьыгъэр дзэ-патриотическэ объединениеу «ЗыкIыныгъ» зыфиIорэм къулыкъу ухьазырыныгъэр щикIунэу зырегъажьэм. Илъэс 19 ыныбжьэу дзэ къулы­къум кIуагъэ. УФ-м хэгъэгу кIоцI IофхэмкIэ и Министерствэ идзэхэм ахэтыгъ, взводым икомандир игуадзэу щытыгъ.

ХэушъхьафыкIыгъэ дзэ операцием кIэлэ ныбжьыкIэр хэлэжьэнэу зэрэхъугъэмкIэ теупчIыгъ.

— Илъэс 15-м къыщегъэжьа­гъэу сищыIэныгъэ дзэ Iофым епхыгъэу щыт. СыныбжьыкIэ къыстефэрэ къулыкъур схьи къы­зысэгъэзэжьми сызхэтыгъэ объединением инструкторэу Iоф щысшIэу сыублагъэ, ныбжьыкIэхэр патриотизмэм фэспIунхэр къыхэсхыгъ. Джащ фэд, республикэ джэгунхэу «Зарница» зыфиIорэми изэхэщэн икIэщакIохэм сахэт. ХэушъхьафыкIыгъэ дзэ операциер къежьагъэу, къэралыгъом IэпыIэгъу ищыкIагъэу зэхэсхыгъэу ащ сымыкIоныр къезгъэ­кIугъэп. Хэгъэгур къэтыухъумэныр тэ, хъулъфыгъэхэм, ти­пшъэрылъэу сэлъытэ, — къы­Iуагъ Александр Юнниковым.

ДзэкIолIыр ежь ишIоигъоныгъэкIэ мэзищ зэзэгъыныгъэм кIатхи, къэтыгъ. Иунагъо лъэшэу къызэрэкъотыгъэр, ащ дзэкIолIым ипсихологическэ зытеткIэ мэхьанэшхо зэриIэр къыхигъэщыгъ.

Унагъом имызакъоу, кIэлэцIыкIухэм дзэкIолIхэм афатхырэ письмэхэми гур къызэрэдащаерэр, ахэм зэкIэми ягуапэу зэолIхэр зэряджэхэрэр хигъэунэфы­кIыгъ.

Александр Юнниковыр зыхэтыгъэ ротэр мафэ горэм псэупIэу Бахмутскэм (Донецкэ лъэныкъом) щыкIогъэ зэпэуцужьым хэлажьэзэ, къыфагъэуцугъэ пшъэрылъхэр щытхъу хэлъэу зэшIуихыгъэх ыкIи къахэщыгъ. Ащ епхыгъэу мы медалыр къыфагъэшъошагъ. Александр нэмыкI тын лъапIэхэри, щытхъу ыкIи рэзэныгъэ тхылъхэри иIэх: бгъэхалъхьэу «За отличие в службе II степени»,

Луганскэ Народнэ Республикэм иорденэу «Казачья доблесть» зыфиIохэрэр.

— УигъэхъагъэхэмкIэ укъыхагъэ­щыныр гушIуагъо ыкIи насыпыгъ, — къеIуатэ А. Юнниковым. — Ащ дакIоу сырэгушхо сикIалэ щысэтехыпIэ сызэрэ­фэхъущтым. Хэта зы­шIэрэр, ар ины зыхъукIэ дзэ Iофыр къыхихынкIи, силъагъо рыкIонкIи мэхъуба?

Александр гухэлъышIоу зыдиIыгъхэм ягугъу къышIыгъ. ХэушъхьафыкIыгъэ дзэ операцием иветеранхэм яшъолъыр Ассо­циацие и Советэу зэхащагъэм ар хэт. Советыр нахь пытэу ылъэ теуцоным мы уахътэм ыуж итых, дзэкIолIэу къяуа­лIэхэрэм ягумэкIыгъохэр дагъэзыжьынхэм, мамыр щыIакIэм хэгъозэжьынхэм дэлэжьэщтых. Охътэ гъэнэфагъэ зыте­шIэкIэ джыри зэзэгъыныгъэм кIэтхэнышъ, хэушъхьафыкIыгъэ дзэ операцием ыгъэ­зэжьынэу А. Юнниковым къыIуагъ.

Iэшъынэ Сусан.