Апэрэ дунэе заом илъэхъан адыгэхэмрэ Пшызэ шъолъыр щыпсэурэ къэзэкъхэмрэ зэкъотныгъэ-гъусэныгъэу зэдыряIагъэм и Мафэ джырэблагъэ Мыекъуапэ щыхагъэунэфыкIыгъ.

Адыгэхэмрэ къэзэкъхэмрэ дзэ ныб­джэгъуныгъэу азыфагу илъым тарихъ лъэпсэ куухэр иIэх. Апэрэ дунэе заор къызежьэм адыгэхэр, Темыр Кавказым щыпсэурэ нэмыкI цIыф лъэпкъхэм ялIыкIохэм афэдэу, Пшызэ шъолъыр ис къэзэкъхэм кIэгъэкъонышхо афэхъугъа­гъэх. А тарихъ мэхьанэ зиIэ хъугъэ-шIагъэр ащымыгъупшэным пае республикэм къыщыдэкIыгъэ хэбзэгъэуцугъэ гъэнэфагъэмкIэ шIэжь мафэр 2014-рэ илъэсым ухэсыгъэ хъугъагъэ.

Мы Iофтхьабзэр Мыекъуапэ икъэлэ парк щыкIуагъ. МэфэкI зэIукIэмрэ концертымрэ яплъынхэу къэкIогъагъэх Адыгэ Республикэм и Къэралыгъо Совет – Хасэм и Тхьаматэ игуадзэу, Урысыем и ЛIыхъужъэу Цэй Эдуард, Адыгэ Рес­публикэм лъэпкъ IофхэмкIэ, IэкIыб къэрал­хэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, Адыгэ Респуб­ликэм иобщественнэ движениеу «Адыгэ Хасэм» ипащэу ЛIымыщэкъо Рэмэзан, Пшызэ къэзэкъ обществэм и Мыекъопэ къэзэкъ къутамэ иатаманэу

Александр Даниловыр, общественностым, студентхэм, кIэлэеджакIохэм ялIыкIохэр.

МэфэкIым къекIолIэгъэ хьакIэхэм закъыфигъазэзэ Адыгэ Хасэм ипащэу ЛIымыщэкъо Рэмэзан къызэриIуагъэмкIэ, адыгэхэмрэ къэзэкъхэмрэ языкIыныгъэ ренэу мэхьанэшхо иIагъ. Кавказым щыпсэурэ цIыф лъэпкъхэр къиныгъохэм апэшIуекIонхэмкIэ, текIоныгъэхэр къыдахынхэмкIэ мэхьанэшхо зиIэ кIуачIэу ар щытыгъ.

— Адыгэхэмрэ нэмыкI цIыф лъэпкъхэмрэ зыч-зыпчэгъоу Урысыер къаухъу­магъ. АщкIэ щысэ шIагъоу щыт «Дивизие IэлкIэ» заджэщтыгъэхэр. Апэрэ дунэе заом илъэхъан Кавказым идзэ кадрэ­хэмрэ иофицерхэмрэ зэшIуахыгъэм уасэ фэшIыгъуай. Унагъом пIуныгъэ дэгъу зэращарагъэгъотырэм, адыгэхэмрэ къэ­зэкъхэмрэ ренэу гукIочIэшхо зэряIэм ар къыкIэкIуагъ. Хэгъэгу зэошхом иилъэс­хэми джащ фэдэу ахэм язэкъотныгъэ къэнэфагъ. Ежьхэм яшIоигъоныгъэкIэ зыхэхьэгъэхэ я 29-рэ кавалерийскэ корпусыр джащыгъум Адыгеим щызэхащэгъагъ, Кущевкэм щаубли, Прагэ дэжь заор щаухыгъ, — къыIуагъ ЛIымыщэкъо Рэмэзан.

Iофтхьабзэм къекIолIагъэхэм шIуфэс къарихыгъ Александр Даниловым. Атаманым къызэрэхигъэщыгъэмкIэ, ятIо­кIэнэрэ лIэшIэгъум иублэгъухэм адэжь адыгэхэмрэ къэзэкъхэмрэ зэдыряеу щыт Хэгъэгум икъэухъумэн чанэу хэлэжьагъэх. Апэрэ дунэе заом лIыхъужъныгъэ­шхо ахэм щызэрахьагъ.

— Тятэжъхэм лIыхъужъныгъэ ин зэра­хьагъ, пытэу ахэр зэкъотыгъэх, къакIэхъу­хьэгъэ лIэужхэми щысэшIу афэхъугъэх. Непэ хэдгъэунэфыкIырэ мафэм адыгэхэмрэ Пшызэ шъолъыр ис къэзэкъхэм­рэ илъэсыбэ хъугъэу азыфагу илъ ныб­­джэгъуныгъэр ащымыгъупшэнымкIэ амалышIоу щыт. Адыгеим мамырныгъэр щыгъэпытэгъэнымкIэ, социальнэ-экономикэ хэхъоныгъэ ащ ышIынымкIэ лъэпсэ пытэ зиIэ лъэпкъ зэгурыIоныгъэр укъуа­гъэ мыхъуным тэркIэ мэхьанэшхо иI, — къыIуагъ Александр Даниловым.

МэфэкI зэIукIэм ыуж къэлэ паркым муниципальнэ творческэ коллективхэм — ансамблэу «Казачатэм», адыгэ къашъом­кIэ ансамблэу «Мыекъуапэ инэфылъэхэр» зыфиIорэм концерт къыщатыгъ.

Александра Балабась.