Пшъэрылъыбэ зэшIозыхын зылъэ­кIыщт гупчакIэу Адыгеим испециалистхэм агъэпсыгъэм икъызэIухын Херсон хэ­кум ит къалэу Геническэ щыкIуагъ. Муниципалитетым щыпсэухэрэм джы къэралыгъо фэIо-фашIэхэр нахь псын­кIэу ыкIи нахь Iэрыфэгъоу къафызэшIуахын алъэкIыщт.

«Урысые Федерацием и Президентэу Владимир Путиным пшъэрылъ къызэрэтфишIыгъэм тетэу шъолъырыкIэхэм социальнэ-экономикэ хэхъоныгъэ ягъэшIыгъэным епхыгъэ IофшIэныр лъытэгъэкIуатэ. Социальнэ, транспорт ыкIи инженер инфраструктурэр зыпкъ итэгъэуцожьы, цIыфхэмкIэ мэхьанэ­шхо зиIэ псэуалъэхэр тэгъэцэкIэжьых ыкIи кIэхэр тэшIых, кадрэхэмкIэ IэпыIэгъу тафэхъу», — къащиIотагъ Адыгеим и ЛIышъхьэу КъумпIыл Мурат социальнэ хъытыухэм.

Геническэ иеджапIэхэм ащыщ горэм игъэкIотыгъэ гъэцэкIэжьын IофшIэнхэр щыкIуагъэх; еджапIэхэу N 1-мрэ N 2-мрэ апае спорт гупчэхэр агъэпсыгъэх, физкультурэмрэ псауныгъэм игъэпытэнрэ япхыгъэ Iофтхьабзэхэр зыщагъэцэкIэщт комплекситIу кIэу ашIыгъ, квадрат метрэ 540-рэ зырыз ахэм аубыты. А пстэуми адакIоу краеведческэ музеир агъэцэкIэжьы. Социальнэ мэхьанэ зиIэ псэолъэ заулэ зыпкъ рагъэуцожьын мурад яI. Муниципалитетым ихэхъоныгъэкIэ хабзэм ичIыпIэ къулыкъухэр къадеIэхэзэ, цIыфхэм яеплъыкIэхэр къыдалъытэхэзэ, «гъогу картэкIэ» заджэхэрэр агъэ­псы.

«Тэ пшъэрылъэу тиIэр Херсон хэкум щыпсэурэ цIыфхэм ящыIакIэ зыпкъ идгъэуцоныр, рэхьатэу Iоф ашIэным, кIэлэцIыкIухэр апIунхэм, медицинэ ыкIи социальнэ IэпыIэгъу зэрагъэгъотыным, къэралыгъо фэIо-фашIэхэр къаратынхэм яамал яIэныр ары. Мы лъэныкъохэмкIэ Iофышхо зэшIотхыгъ, тапэкIи джащ тетэу тылъыкIотэн мурад тиI», — къы­хигъэщыгъ КъумпIыл Мурат.