Урысые Федерацием и Конституцие ия 38-рэ статья ия 3-рэ Iахь къызэриIорэмкIэ, илъэс 18 хъугъэхэу Iоф зы­шIэн зылъэкIыщтхэм анаIэ атырагъэтын фае ны-тыхэу Iоф зымышIэшъухэрэм. Джащ фэдэу УФ-м унэ­гъо IофхэмкIэ и Кодекс ия 87-рэ ста­тья къызэриIорэмкIэ, зы­ныбжь икъугъэхэм Iоф зымышIэшъурэ янэ-ятэхэр аIыгъынхэ, афэгумэкIынхэ фае. Ежьхэм яшIоигъоныгъэкIэ ар зымыгъэцэкIэрэ лъфыгъэхэм хьыкумым ыгъэ­нэфэгъэ ахъщэр (алиментыр) атын фаеу апшъэ релъхьэ. Хьыкумым а ахъщэр зыфэдизыщтыр ыгъэнэфэн зыхъукIэ, лъфыгъэхэми, ны-тыхэми мылъкум ылъэ­ныкъокIэ яIофхэм язытет къыпкъырэкIы, нэмыкIхэуи унаIэ зытебдзэн плъэкIыщтхэр къыделъытэх.

ФэбгъэгъунымкIэ ушъхьагъу щымыIэу зыныбжь икъугъэм ахъщэр ымытэу мэзитIу е нахьыбэ зытыригъашIэкIэ, УФ-м и Кодекс ия 5.35.1-рэ статья ия 2-рэ Iахь тегъэпсыхьагъэу административнэ пшъэдэкIыжь рагъэхьын алъэ­-кIыщт. Iоф ымышIэмэ мыхъунэу сыхьати 150-рэ фагъэнафэ е чэщ-мэфи 10-м къыщыублагъэу 15-м нэсэу «административнэ аресткIэ» заджэхэрэр тыралъхьэ.

Ащ фэдэ пшъэдэкIыжьмэ ауж етIани ахъщэ ымыты хъумэ, УФ-м и Уголовнэ кодекс ия 157-рэ статья ия 2-рэ Iахь диштэу уголовнэ пшъэдэкIыжь рагъэхьы: зы илъэсым нэсэу егъэзыгъэкIэ Iоф рагъэшIэщт е зы илъэсым нэсэу хьапс тыралъхьан алъэкIыщт.

Янэ-ятэхэмкIэ лъфыгъэхэм пшъэ­дэкIыжь арагъэхьыщтэп ежь ны-тыхэми якIэлэцIыкIухэмкIэ пшъэрылъэу яIагъэр амыгъэцэкIагъэ зыхъукIэ. Ар хьыкумым ыгъэунэфыгъэу щытын фае. Ны-тыхэу кIэлэцIыкIухэр апIунхэмкIэ фитыныгъэ зимыIэжь ашIыгъагъэхэм афэгумэкIынхэу, алъыплъэнхэу, аIыгъыжьынхэу ялъфыгъэхэр ригъэзынхэу хэти фитэп.