Iоныгъо мазэм и 16 — 17-м Адыгеим игъомылэпхъэ мэфэкI анахь шъхьаIэ­хэм ащыщэу адыгэ къуаем ифестиваль щызэхащэщт. Мыгъэрэр я 12-у хъущт.

Къихьащт тхьамафэм изыгъэпсэфыгъо мэфитIу къыдыхэлъытэгъэщт Iофтхьэбзэ зэфэшъхьафхэр, хабзэ зэрэхъугъэу, Мыекъопэ районым ипсэупIэу Дахъо икъушъхьэтхэу Унэ-Козэ къыпэIулъ гъэхъунэм щызэхащэщтых:

Iоныгъом и 16-м сыхьатыр 11-м къыщыублагъэу пчыхьэм 7-м ыныкъо хэхьэфэкIэ лъэпкъ щагужъыехэр зэIухыгъэщтых;

сыхьатыр 11-м «Налмэсыр» къэшъощт;

12-м ыныкъокIэ кIуагъэу фестивалыр къызэIуахыщт;

11-м къыщыублагъэу пчыхьэм 4-м нэс лъэпкъ проектэу «Лъэуж» зыфиIорэр агъэцэкIэщт;

11-м къыщыублагъэу пчыхьэм 5-м ыныкъо хэхьэфэкIэ IэпэIэсэныгъэм идесэхэр къатыщтых;

мы охътэ дэдэм Шыу Хасэм икъэгъэлъэгъонхэр щыIэщтых;

сыхьатыр 2 хъункIэ такъикъ 20 иIэжьэу рагъэжьэнышъ, сыхьатырэ концерт къатыщт;

сыхьатыр 3 хъункIэ такъикъ 20 иIэжьэу къуаер анахь псынкIэу зышхыщтымкIэ зэнэкъокъу зэхащэщт;

ащ ыуж упчIэ-джэуап зэнэкъокъу щыIэщт;

пчыхьэм сыхьатыр 4-м къыщыублагъэу 5 хъункIэ такъикъ 15 иIэжь мэхъуфэкIэ концерт щыIэщт ыкIи кIэлэцIыкIухэм апае зэнэкъокъухэр зэхащэщтых, пчыхьэм сыхьатыр такъикъи 10-кIэ 6-м хэхьагъэу республикэм икъэшъуакIохэмрэ иорэдыIохэмрэ концерт къатыщт, ар «Удж хъураекIэ» аухыжьыщт. МэфэкI жъогъотопкIэ сыхьатыр 7-м ыныкъом апэрэ мафэр зэфашIыжьыщт.

Iоныгъом и 17-м мафэм сыхьатыр 11-м аублэнышъ, пчыхьэм сыхьатыр 5-м нэс Iофтхьэбзэ зэфэшъхьафхэр зэхащэщтых: лъэпкъ щагужъыехэр зэIухыгъэщтых, концертхэр, IэпэщысэшIынымкIэ десэхэр, гъомылэ­пхъэшIынымкIэ зэнэкъокъухэр рагъэкIокIыщтых, зэ­фэ­хьысыжьхэр ашIыщтых, адыгэ джэгум къыкIэлъы­кIощт «Удж хъураекIэ» мэфэкIыр аухыщт.

Ащ къекIолIэрэ пстэури ыпкIэ хэмылъэу дагъэхьащт, къэмыкIошъущтхэр онлайн-шIыкIэкIэ еплъышъущтых.