КIэлэцIыкIухэр къыхагъэлэжьагъэх

ГъогурыкIоныр щынэгъончъэным фэгъэхьыгъэ зэIукIэгъоу инспекторхэм зэхащагъэм кIэлэцIыкIу ыкIи Iэтэхъо нэбгыри 100-м ехъу къырагъэблэгъагъ. Анахь шъхьаIэу зытегущыIагъэхэр кIэлэцIыкIу гъогу-транспорт фыкъоныгъэр дэгъэзыжьыгъэныр ары.

Iофтхьабзэр Джэджэ районым ики-нотеатрэхэм ащыщ щырагъэкIокIыгъ. Ащ хэлэжьагъэх гъогу полицейскэхэр, зы-ныбжь имыкъугъэхэм яIофхэмкIэ под-разделением иинспекторхэр, район администрацием иIофышIэхэр, ны-тыхэр.

Къэралыгъо автоинспекторхэм къэзэ-рэугъоигъэхэм агу къагъэкIыжьыгъ лъэ-сэу е кушъхьэфачъэм тесхэу гъогум тетхэ зыхъукIэ анаIэ зытырагъэтын фэе лъэныкъохэр. Джащ фэдэу чIыпIэ зэфэшъхьафэу гъогум зыщифэнхэ алъэ-кIыщтхэм къызэрахэкIыжьыщтхэр зэIу-кIэгъум щызэхафыгъэх.

Нэфынэр къэзытырэ пкъыгъохэр ящыгъынхэм ахалъхьанхэу зэрэщытыри зыщамыгъэгъупшэнэу араIуагъ. Бжыхьэ-кIымэфэ лъэхъанхэм, мафэр нахь кIако зыщыхъурэм, а пкъыгъохэр шIокI имыIэу кIэлэцIыкIухэм агъэфедэнхэу зэрэщытыр агурагъэIуагъ. Ащ ишIуагъэкIэ ахэм гъогур зэпачы зыхъукIэ водительхэм нахь къалъэгъущтых.

ХэбзэухъумакIохэм ныбжь зиIэу къе-кIолIагъэхэми хэушъхьафыкIыгъэ гущы-Iэхэр афагъэзагъэх. КIэлэцIыкIухэм гъогум зызэрэщагъэпсыщтыр ны-тыхэм арагъэлъэгъурэ щысэм бэкIэ зэрепхыгъэр къыхагъэщыгъ. ГъогурыкIоным хэлэжьэрэ пстэуми шIокI имыIэу шапхъэхэр агъэцэкIэнхэу зэрэщытыр инспекторхэм хагъэунэфыкIыгъ.

ЗэIукIэгъум икIэухым гъогурыкIоныр щынэгъончъэным фэIорышIэрэ видео-ролик къэзэрэугъоигъэхэм къафагъэ-лъэгъуагъ, шапхъэхэр зэрытхэгъэ тхьапэ-хэр, нэфынэр къэзытырэ пкъыгъохэр афагощыгъэх.

ПсынкIэ зекIоныр щыжъугъэзый!

Адыгеим икъэралыгъо авто-инспекторхэм машинэр зезыфэхэрэр гъогум зэрэщызекIохэрэм илъэшыгъэ шапхъэхэм бламыгъэкIыным къы-фэджагъэх.

Республикэм игъогухэм къатехъухьэрэ хъугъэ-шIэгъэ хьылъэхэм алъапсэхэм ащыщ шапхъэхэм ашъхьадэкIырэ псынкIэ зечъэныр. Ащ епхыгъэу Мыекъуапэ, Джэджэ ыкIи Мыекъопэ районхэм яинспекторхэм пэшIорыгъэшъ Iофтхьабзэу «Скорость» зыфиIорэр зэхащагъ.

Республикэм икъэралыгъо авто-инспекторхэм транспорт амалхэр зезыфэхэрэм зафагъэзагъ гъогум гулъытэрэ сакъыныгъэрэ къызщы-хагъэфэнхэу, псынкIэу мызечъэнхэу, апэ ит машинэм азыфагу дэлъ зэпэчы-жьагъэр щынэгъончъэу къыхахынэу, лъэсрыкIохэр блатIупщынхэу.

Ащ нэмыкIэу анаIэ зытырарагъэ-дзагъэхэм ащыщ машинэхэр зыщыкIохэрэ гъогум пэгъунэгъоу лъэсэу тетхэм е урамыр зэпызычынэу ежьи, ыгузэгу къытенагъэхэм афэсакъынхэу зэрэщытыр. Статистикэм къызэригъэлъагъорэмкIэ, лъэсрыкIохэр зыхэфэрэ гъогу хъугъэ-шIагъэхэр анахьэу мэзэхэ уахътэр ары зыхъухэрэр.

Полицейскэхэр гущыIэгъу зыфэхъугъэ-хэм авариехэм ахэмыфэнхэмкIэ зэрэзекIонхэ фэе шIыкIэхэр игъэкIотыгъэу къафаIотагъ, шапхъэхэр зэрытхэгъэ тхьапэхэр аратыгъэх. Iофтхьабзэм хэлэжьэгъэ водительхэми яIахьылхэм ыкIи ягупсэхэм мы шапхъэхэр къафа-Iотэнхэу зафагъэзагъ.

Гъогогъу 36-рэ IэпыIэгъу афэхъугъэх

Автоинспекторхэм гъогу хъугъэ-шIагъэхэм ахэфагъэхэм апэрэ IэпыIэгъур гъогогъу 36-рэ арагъэгъотыгъ.

Гъогу-транспорт хъугъэ-шIагъэхэм ащыфыкъуагъэхэм апэрэ IэпыIэгъур тэрэзэу зэрябгъэгъотыщтым мэхьанэ иI ыкIи инспектор пэпчъ а шIэныгъэхэр IэкIэлъынхэу щыт. Ащ пае апэрэ IэпыIэ-гъур зищыкIэгъэ цIыфым ар зэреб-гъэгъотыщт шIыкIэр охътэ гъэнэфагъэ тешIэ къэс полицейскэхэм кIаджыкIыжьы. Мыщ фэдэ десэхэр хэбзэухъумакIохэм афызэхэзыщэхэрэр IэпыIэгъу псынкIэмкIэ станциер ыкIи ошIэ-дэмышIэ тхьа-мыкIагъохэмкIэ Адыгэ республикэ медицинэ Гупчэр ары.

БлэкIыгъэ мазэм тхьамэфитIу егъэджэгъухэр Гупчэм щыкIуагъэх. Ащ гъогу-патруль къулыкъум иIофышIэ нэбгыри 8 хэлэжьагъ.

Къыхэдгъэщымэ тшIоигъу, федеральнэ проектэу «ГъогурыкIоныр щынэгъон-чъэныр» зыфиIорэм ипхырыщын къыдыхэлъытагъэу полицием ипатруль машинэхэм зэкIэми апэрэ IэпыIэгъур ягъэгъотыгъэнымкIэ хэушъхьафыкIыгъэ аптечкэхэр арылъых. Аварием хэфа-гъэхэу шъобж хьылъэ зытещагъэхэр медицинэ учреждением нагъэсыфэхэкIэ ящыIэныгъэ къызэтегъэнэгъэнымкIэ инспекторхэм а аптечкэхэм яшIуагъэ къякIы.

Статистикэм къызэригъэлъэгъуа-гъэмкIэ, мы илъэсыр къызихьагъэм къыщыублагъэу Адыгеим икъэралыгъо автоинспекторхэм ахэр гъогогъу 36-рэ агъэфедагъэх. ПсынкIэу ыкIи зэри-фэшъуашэу арагъэгъотыгъэ апэрэ IэпыIэгъум ишIуагъэкIэ нэбгырэ пчъа-гъэхэм ящыIэныгъэ ыкIи япсауныгъэ къызэтырагъэнэн алъэкIыгъ.

Гъогу хъугъэ-шIагъэхэм ахэфагъэхэм апэрэ IэпыIэгъур ягъэгъотыгъэным ипрограммэ зэракIугъэр къэзыушыхьатырэ тхылъхэр джы тапэкIэ егъэджэгъу уахътэр заухыкIэ аратыхэзэ ашIынэу рахъухьагъ.

ЛъэсрыкIохэм ящынэгъончъагъ

Статистикэм къызэригъэлъагъорэмкIэ, гъогурыкIоным ишапхъэхэр лъэсрыкIохэм мафэ къэс зэраукъорэр Адыгеим щагъэунэфы. Мыхэр ары гъогу-транспорт хъугъэ-шIагъэхэм шъобжхэр анахьэу ахэзыхыхэрэр.

Мы Iофыгъом джыри зэ анаIэ тырадзэным, джащ фэдэу транспортыр анахьыбэу зыщызекIорэ чIыпIэхэм лъэсрыкIохэм сакъыныгъэ къызщы-хагъэфэным афэшI Адыгеим икъэралыгъо автоинспекторхэм Iофтхьабзэу «ЛъэсрыкIу» зыфиIорэр зэхащагъ. Ар Джэджэ, Кощхьэблэ ыкIи Мыекъопэ районхэм, республикэ гупчэм ащыра-гъэкIокIыгъ.

ЦIыфхэм гущыIэгъу афэхъухэзэ гъогу полицейскэхэм зэрэхагъэунэфы-кIыгъэмкIэ, лъэсрыкIохэр зыхэфэхэрэ авариехэр амыгъэIорышIэрэ гъогу зэхэкIыпIэхэр ары анахьэу зыщыхъухэрэр. Машинэхэр зэрыкIорэ гъогур цIыфхэм зэпачы зыхъукIэ икъоу Iофым изытет зыщагъэгъуазэрэп. Водителым лъэсрыкIор блигъэкIынэу зэрэщытыр IэубытыпIэ ашIызэ, автомобилыр къэсыгъахэу гъогум телъадэх. Гъогур зэпыпчыным ыпэкIэ пэшIорыгъэшъэу уищыIэныгъэкIэ щынэгъончъэу щытмэ зыщыбгъэгъозэн фае. Машинэр зэрэпшIоигъоу игъом къэбгъэуцун зэрэмылъэкIыщтыр лъэсрыкIохэм къагурыIонэу щыт.

Авариеу тигъогухэм къатехъухьэхэрэр къызхэкIыхэрэм ягугъу къэтшIымэ, инс-пекторхэм къыхагъэщырэр мэзэхэ уахътэм цIыфхэм зыщалъэрэ шъуашэхэр зэрэшIуцIашъохэр, ахэр водительхэм икъоу зэрамылъэгъурэр ары. Арышъ, амал зэриIэкIэ пчыхьэшъхьапэхэм нэфынэр къэзытырэ пкъыгъохэр ящыгъынхэм е Iалъмэкъхэм ахалъхьэхэмэ нахьышIу.

Iофтхьабзэм хэлажьэхэрэм зэдэ-гущыIэгъухэр задашIыхэ нэуж гъогу полицейскэхэм шапхъэхэр зэрытхэгъэ хэушъхьафыкIыгъэ тхьапэхэр аратыгъэх.

НэкIубгъор зыгъэхьазырыгъэр IЭШЪЫНЭ Сусан.