Адыгэ Республикэм и Лъэпкъ тхылъеджапIэ Урысые Федерацием тран­спортымкIэ и Министерствэ шIухьафтын къыфишIыгъ, ар тхылъэу «100 лет отечественной гражданской авиации» зыфиIоу, ошъогур «зыушэ­тыхэрэм» ялIыгъэ-гъэхъагъэ ыкIи яIофшIэн гъогу къызыщыIотагъэр ары.

Тхылъыр нэкIубгъо 544-рэ мэхъу ыкIи ар хъугъэ-шIэгъэ гуап.

Лъэпкъ тхылъеджапIэм иотдел ипащэу Нина Плотнерчук мыщ фэдэ къыдэкIыгъо-къытедзэгъум щыIэкIэ-псэукIэмкIэ мэхьанэшхо зиIэ граждан авиацием ехьылIэгъэ тхылъым уасэ иIэу елъытэ.

Лъэпкъ тхылъеджапIэм ифонд къыдэкIыгъо гъэшIэгъонэу «100 лет отечественной гражданской авиации» зыфиIорэр къызэрэхэхъуагъэм уегъэгушIо, хэгъэгу­шхом иошъогу гъогу цIыфым къызэрэзыфигъэIорышIэрэр ащ къыщиIотыкIыгъ.

Илъэси 100-м къыкIоцI тихэгъэгу играждан авиацие зэрэзэтеуцуагъэр, зызэриштагъэр ащ зэкIэлъыкIоу, IупкIэу къыщытыгъ. Сурэттехыгъэ хьаламэтхэр, хъарзынэщ документхэр, ахэм яхьылIэгъэ къэIотэнхэр къыщытыгъэх, илъэси 100-м къыкIоцI граждан авиацием гъогушхоу къыкIугъэр нэм къыкIегъэуцо. УФ-м и Правительствэ и Тхьаматэу М. В. Мишустиным тхылъым игущыIапэ щыхигъэунэфыкIыгъ мы къыдэкIыгъом ыуасэ: «Создано в знак глубокого уважения и признательности к ветеранам и работникам отрасли».

Тхылъеджэ чанхэм авиационнэ техникэм ехьылIагъэу мыщ бэ дагъотэщтыр.

УнаIэ зытырыуегъадзэ тихэгъэгушхо аэропортхэр къызэрэщызэIуахыгъэм. ГущыIэм пае, аэропортэу Минеральные Воды — 1925-м, Махачкала — 1927-м ыкIи Анапа — 1934-рэ илъэсым зэрэщагъэпсыгъэхэм.

Тхылъым чIыпIэ хэхыгъэ щыряI Урысыем иеджэпIэ анахьыжъхэу граждан авиацием фэгъэзэгъагъэхэм щылэжьэщтхэр зыщагъэхьазырыщтыгъэхэм. Щысэхэу анахь бгъэшIагъо икъухэу авиацием хэтхэр: апэрэ граждан серийнэ къухьэлъатэр, «самолет-гигантыр», апэрэ аэровокзалыр, нэмыкIхэри.

Къэралыгъом ипащэхэм ыкIи зэлъашIэрэ IофышIэшхохэм граждан авиациемкIэ гупшысэу къыраIотыкIыгъэ­хэр, граждан авиацием зекIонымкIэ ипшъэрылъхэр ащыкIэгъэтхъыгъ ыкIи мы лъэныкъор, сыд фэдэрэ уахъти хэгъэгумкIэ мэхьанэшхо иIэу зэрэщытыр лIэшIэ­гъу тарихъым щыгъэунэфыгъ. Граждан авиациер сыдигъуи уасэ зыфашIырэ лъэныкъоу щытыгъ ыкIи къэ­нэжьы, хахъо ышIызэ ар уахътэм сыдигъуи дэ­лъэбакъо. (Тикорр.).