Лъэс кIонымкIэ марафонэу «Долина яблок» зыфиIорэр республикэм икъэлэ шъхьаIэ щыкIуагъ. Ащ нэбгыри 158-рэ хэлэжьагъ.

Псауныгъэр гъэпытэгъэным фытегъэпсыхьэгъэ Iофтхьабзэм кIэщакIо фэхъугъэр Мыекъуапэ физическэ культурэмкIэ ыкIи спортымкIэ и Комитет ары.

Марафоным хэлажьэхэрэм пшъэрылъ шъхьаIэу яIагъэр мэфиблым къыкIоцI лъэбэкъу мини 100 къакIуныр ары. Мыекъуапэ и Мафэ ихэгъэунэфыкIын епхыгъэу мыр рагъэкIокIыгъ. Мафэ къэс зы нэбгырэм гурытымкIэ лъэбэкъу 14285-рэ къыкIун фэягъ, ар тхьамафэм телъыта­гъэу зызэхэплъытэжьыкIэ километри 10-м ехъу.

Iофтхьабзэм хэлэжьэрэ нэбгырэ пэпчъ ежь зэрыкIощт гъогур къыхихын ылъэкIыщтыгъ. Приложениеу «Шаги ВКонтакте» зыфиIорэмкIэ ахэм алъыплъагъэх.

Зэфэхьысыжьхэм къызэрагъэлъэгъуагъэмкIэ, апэу марафоныр къэзыкIугъэхэр Адыгеим икъэлэ шъхьаIэ щыпсэухэрэ Елена Зезюкинамрэ Оксана Киракосянрэ. Iофтхьабзэм иапэрэ мафэ ахэм шапхъэр рагъэкъугъ, ащ пае сы­хьат 19-рэ лъэсэу къакIухьагъ. Зигугъу къэтшIыгъэ нэбгыритIур 2020-рэ илъэсым ичъэпыогъу мазэ щыублагъэу мыщ фэдэ марафонхэм, фестивальхэм ахэлажьэх. Iофтхьабзэу «Долина яблок» зыфиIорэм къыдыхэлъытэгъэ шапхъэхэр нэбгырэ 91-мэ агъэцэкIагъ. Ахэм зэкIэми дипломхэр афагъэшъошагъэх.

Мыекъуапэ физическэ культурэмкIэ ыкIи спортымкIэ и Комитет кIэщакIо зыфэхъурэ мыщ фэдэ Iофтхьабзэхэм язэхэщэн мэхьанэшхо иI. ЦIыфхэм япсауныгъэ зэрагъэпытэрэм дакIоу, ахэр зэIокIэх, зэдэгущыIэх, шIуагъэ къытэу яуахътэ агъакIо.